رام اللہ – (روزنامہ قدس ـ آنلائن خبر رساں ادارہ) مقبوضہ مغربی کنارے کے وسطی شہر رام اللہ کے شمال مغرب میں واقع گاؤں دیر ابو مشعل پر یہودی آباد کاروں کے ایک حملے کی میدانی کوریج کے دوران قابض اسرائیل کی فورسز کی طرف سے فائر کیے گئے گیس بم لگنے سے ایک فلسطینی صحافی زخمی ہو گیا۔ یہ واقعہ مقبوضہ مغربی کنارے کے فلسطینی دیہات اور قصبوں پر یہودی آباد کاروں کی بڑھتی ہوئی جارحیت کے دوران پیش آیا۔
مقامی ذرائع نے بتایا کہ ’قدس‘ نیوز نیٹ ورک کے نامہ نگار، صحافی معتصم سقف الحیط اس وقت پاؤں میں زخمی ہوئے جب وہ گاؤں میں فلسطینی نوجوانوں اور یہودی آباد کاروں کے درمیان ہونے والی جھڑپوں کی کوریج کر رہے تھے۔
ذرائع کے مطابق یہ واقعات یہودی آباد کاروں کی طرف سے گاؤں کے رہائشیوں پر کیے گئے حملے کے بعد شروع ہوئے، جس کے بعد قابض فوج نے مداخلت کی اور یہودی آباد کاروں کو تحفظ فراہم کرنے کے لیے علاقے میں گھس آئی، جس کے نتیجے میں مقامی لوگوں کے ساتھ تصادم شروع ہو گیا۔
اسی سلسلے میں یہودی آباد کاروں نے رام اللہ گورنری کے دیگر علاقوں میں بھی حملے جاری رکھے، جہاں انہوں نے قصبہ سنجل کے شمال مغرب میں ’غرابہ‘ کے علاقے میں اپنی بھیڑیں فلسطینی زمینوں پر چھوڑ دیں، جبکہ دیگر یہودی آباد کاروں کے گروپوں نے المغیر اور ابو فلاح دیہات کو ملانے والی مرج سیع روڈ پر پیش قدمی کی۔
مغربی کنارے کے وسیع علاقے یہودی آباد کاروں کے مسلسل حملوں کی زد میں ہیں، جن میں فلسطینی دیہات اور بستیوں پر حملے، شہریوں اور ان کی املاک کو نقصان پہنچانا شامل ہے، اور یہ سب کچھ مختلف گورنریوں میں قابض اسرائیل کی افواج کی جانب سے بار بار کیے جانے والے فوجی چھاپوں کے ساتھ ہو رہا ہے۔
اس کے علاوہ فلسطینی زرعی زمینوں پر حملے بھی جاری ہیں جن میں جلانے، بلڈوز کرنے، زبردستی چرانے اور کسانوں کو ان کی زمینوں تک پہنچنے سے روکنے کے واقعات شامل ہیں، خاص طور پر یہودی بستیوں اور چوکوں سے متصل علاقوں میں۔
یہ صورتحال سات اکتوبر سنہ 2023ء سے مغربی کنارے میں بے مثال کشیدگی کے سائے میں پیش آ رہی ہے۔ فلسطینی اعداد و شمار کے مطابق قابض فوج اور یہودی آباد کاروں کے حملوں کے نتیجے میں اب تک 1129 فلسطینی شہید اور 12 ہزار 666 زخمی ہو چکے ہیں، اس کے علاوہ تقریباً 23 ہزار فلسطینیوں کو گرفتار اور مقبوضہ مغربی کنارے کے مختلف علاقوں سے تقریباً 23 ہزار فلسطینیوں کو بے گھر کیا گیا ہے۔
