مقبوضہ مغربی کنارہ – (روزنامہ قدس ـ آنلائن خبر رساں ادارہ) مقبوضہ مغربی کنارے کے وسط میں واقع رام اللہ کے شمال مغرب میں بلدہ بیتیللو اور جمالا کے مضافات میں درجنوں مسلح یہودی آباد کاروں کی طرف سے کیے گئے ایک ہولناک حملے میں تین فلسطینی زخمی ہو گئے جن میں سے ایک کی حالت تشویشناک ہے ۔ یہ حملہ قابض اسرائیل کی ظالم افواج کے مکمل تحفظ میں کیا گیا۔ یہ حملہ غاصب صہیونی دشمن ریاست کی طرف سے نہتے فلسطینیوں کی نسل کشی اور ان پر ڈھائے جانے والے مظالم کا ایک اور واضح ثبوت ہے۔
یہ بزدلانہ حملہ مقبوضہ مغربی کنارے اور مقبوضہ بیت المقدس کے مختلف علاقوں میں جنونی یہودی آباد کاروں کے بڑھتے ہوئے وحشیانہ حملوں کا تسلسل ہے جن میں فلسطینی شہریوں اور ان کی املاک کو مسلسل نشانہ بنا کر فلسطینیوں کے بنیادی حقوق کو کچلا جا رہا ہے۔
مقامی اور سکیورٹی ذرائع نے بتایا کہ یہودی آباد کاروں کے مسلح گروہوں نے "حلمیش” نامی غیر قانونی بستی اور اس کے ارد گرد قائم دیگر چرواہی بستیوں سے نکل کر "الظہر” کے علاقے اور دونوں قصبوں کے ساتھ واقع شمالی داخلی راستے پر موجود فلسطینیوں کے پرامن مکانات پر دھوا بول دیا۔
اس سفاکانہ حملے کے دوران یہودی آباد کاروں نے معصوم شہریوں کے گھروں پر شدید پتھراؤ کیا اور کئی مقامی باشندوں کو بے دردی سے زدوکوب کیا جن میں ایک معمر بزرگ، ایک بچہ اور ایک خاتون بھی شامل ہیں جس کے نتیجے میں وہ شدید زخمی ہوئے اور ان کے جسموں پر گہرے زخم آئے۔
چشم دید گواہوں نے تصدیق کی ہے کہ مقامی غیور شہریوں کی طرف سے اس حملے کو ناکام بنانے اور گھروں پر غاصبانہ قبضے کی ناپاک کوششوں کے خلاف مقاومت کے بعد صیہونی غاصبوں اور اہالیانِ علاقہ کے درمیان شدید جھڑپیں شروع ہو گئیں۔
بلدہ بیتیللو کے سربراہ نصر رضوان نے بتایا کہ یہودی آباد کاروں نے اپنے گھروں کا دفاع کرنے والے نہتے شہریوں پر براہِ راست اندھا دھند لائیو فائرنگ کی جس کے نتیجے میں تین فلسطینی نوجوان پیٹ، ہاتھ اور گردن میں گولیاں لگنے سے شدید زخمی ہوئے جن میں سے ایک کی حالت انتہائی تشویشناک ہے۔
عینی شاہدین نے مزید ہولناک انکشاف کیا کہ قابض اسرائیل کی ظالم فورسز نے اس حملے کے دوران یہودی آباد کاروں کو مکمل سکیورٹی فراہم کی اور فلسطینیوں پر آنسو گیس کے شیل اور ربڑ کی گولیاں برسائیں تاکہ آس پاس کے دیہاتوں سے مظلوم خاندانوں کی مدد کے لیے پہنچنے والے دیگر فلسطینیوں کو روکا جا سکے۔
غاصب صیہونی فورسز کے ان جابرانہ اقدامات اور زہریلی گیس کی وجہ سے درجنوں فلسطینیوں کا دم گھٹ گیا اور وہ شدید متاثر ہوئے جن میں سے بیشتر کا موقع پر ہی علاج کیا گیا۔
اسی تسلسل میں پہر رام اللہ کے شمال میں واقع گاؤں ام صفا کے مشرقی حصے میں یہودی آباد کاروں نے ایک مقامی فلسطینی شہری محمد العبیات کے گھر کے بالکل قریب زبردستی ایک توسیعی خیمہ نصب کرنا شروع کر دیا۔
ام صفا کی مقامی کونسل نے غاصب صیہونیوں کے اس اقدام کو ایک انتہائی خطرناک موڑ قرار دیا ہے جس کا مقصد مقامی آبادی کا جینا دوبھر کر کے انہیں ہجرت پر مجبور کرنا ہے تاکہ ان اراضی پر غاصبانہ قبضہ جما کر غیر قانونی یہودی بستیوں کے دائرہ کار کو وسعت دی جا سکے۔
نابلس گورنری میں بھی مسلح یہودی آباد کاروں نے شہر کے شمال مغرب میں واقع بلدہ برقہ کی اراضی پر مشتمل المسعودیہ کے علاقے میں محنت کش فلسطینی کسانوں پر بزدلانہ حملہ کر دیا تاکہ انہیں زبردستی اپنی آبائی زمینوں سے بے دخل کیا جا سکے۔
المسعودیہ کی اراضی کے دفاع کے لیے قائم کمیٹی کے سربراہ ذیاب حجی نے بتایا کہ یہودی آباد کاروں نے علاقے پر دھوا بولا اور کھیتوں میں کام کرنے والے کسانوں پر اس وقت وحشیانہ حملہ کیا جب وہ روزی روٹی کمانے میں مصروف تھے، اور یہ کارروائی اس صوبے میں فلسطینیوں کے وجود کو مٹانے کے لیے جاری گذشتہ مہم اور مسلسل صیہونی سفاکیت کا حصہ ہے۔
