مقبوضہ بیت المقدس – (روزنامہ قدس ـ آنلائن خبر رساں ادارہ) مسجدِ اقصیٰ مبارک کے خطیب فضیلۃ الشیخ عکرمہ صبری نے مقبوضہ بیت المقدس اور سنہ 1948ء کے مقبوضہ علاقوں میں اذان پر پابندی عائد کرنے کی غاصب صہیونی دشمن کی ایک اور ناپاک کوشش کے شدید خطرات سے سخت الفاظ میں خبردار کیا ہے۔
مقبوضہ بیت المقدس میں سپریم اسلامک کونسل کی جنرل باڈی کے سربراہ الشیخ عکرمہ صبری نے آج پیر کے روز اپنے ایک جذباتی اور تڑپتے ہوئے بیان میں فرمایا کہ اذان کی آواز کو دبانے یا اس پر مکمل پابندی لگانے کی متعدد گذشتہ ناکام کوششوں کے بعد اب اس حساس ترین معاملے کو ایک بار پھر اچھالا گیا ہے تاکہ مسلمانوں کے مذہبی جذبات کو پامال کیا جا سکے۔
غاصب صہیونی ریاست کی قانون سازی سے متعلق وزارتی کمیٹی نے گذشتہ اتوار کے روز اذان پر پابندی کے حوالے سے ایک انتہائی متعصبانہ قانون کے مسودے کی منظوری دی ہے اور یہ ظالمانہ بل قابض اسرائیل کے انتہائی ہٹ دھرم دائیں بازو کے انتہا پسند گروہ کی جانب سے پیش کیا گیا ہے جس کی قیادت قابض اسرائیل کا سکیورٹی کا وزیر ایتمار بن گویر کر رہا ہے۔
اس نسل پرستانہ اور ظالمانہ قانون کے مسودے میں یہ شرط عائد کی گئی ہے کہ اب کسی بھی مسجد میں باقاعدہ سرکاری لائسنس حاصل کیے بغیر کوئی بھی صوتی نظام (لاؤڈ سپیکر) نہ تو نصب کیا جا سکتا ہے اور نہ ہی اسے چلایا جا سکتا ہے اور اس لائسنس کی منظوری کو نام نہاد شور کی شدت اور رہائشی علاقوں سے مسجد کے فاصلے کی بنیاد پر پرکھا جائے گا۔
اس غاصبانہ قانون کے تحت قابض اسرائیل کے سکیورٹی اہلکاروں کو یہ جابرانہ اختیار بھی دے دیا گیا ہے کہ وہ جب چاہیں اذان کو فوری طور پر رکوا دیں اور مساجد کے لاؤڈ سپیکرز کو زبردستی ضبط کر لیں۔ اس سیاہ قانون کو باقاعدہ نافذ العمل کرنے کے لیے اب صہیونی پارلیمنٹ (کنيسٹ) کی منظوری کی ضرورت ہے جس کی تاریخ کا تعین ابھی نہیں کیا گیا۔
الشیخ عکرمہ صبری نے اس ہولناک حقیقت پر شدید تشویش کا اظہار کرتے ہوئے خبردار کیا کہ اذان کو روکنے کی موجودہ صہیونی سازش اب ایک انتہائی خطرناک رخ اختیار کر چکی ہے اور وہ ہتھکنڈہ یہ ہے کہ اب قانون سازی کی آڑ میں اذان پر پابندی کو جائز اور قانونی شکل دی جا رہی ہے تاکہ فلسطینیوں کی اسلامی شناخت کا مٹایا جا سکے۔
انہوں نے مزید دوکٹوک انداز میں فرمایا کہ اگر بین الاقوامی اور سیاسی نقطۂ نظر سے دیکھا جائے تو غاصب استعماری طاقت کو یہ حق بالکل حاصل نہیں ہے کہ وہ مقبوضہ علاقوں کی تاریخی اور مروّجہ حیثیت میں کسی بھی قسم کی کوئی تبدیلی کرے۔
انہوں نے ایمان افروز لہجے میں اپنی بات جاری رکھتے ہوئے فرمایا کہ جہاں تک خالص دینی اور شرعی نقطۂ نظر کا تعلق ہے تو اذان ایک عظیم اسلامی شعار اور خالص ترین عبادات میں سے ایک اہم ترین عبادت ہے، لہٰذا غاصب مقتدرہ کو اس الہی امر میں مداخلت کا کوئی حق نہیں پہنچتا اور نہ ہی اسے اذان کی آواز کو روکنے کی جسارت کرنی چاہیے کیونکہ یہ کھلی سفاکیت دنیا بھر میں تسلیم شدہ آزادیِ عبادت کے بنیادی اصول کے سراسر منافی ہے۔
فضیلۃ الشیخ عکرمہ صبری نے تاریخ کے روشن ابواب کا حوالہ دیتے ہوئے یاد دلایا کہ مسجدِ اقصیٰ مبارک کے مقدس در و دیوار میں اور مقبوضہ بیت المقدس کے آسمان پر سب سے پہلے جس ہستی نے اذانِ حق بلند کی تھی وہ ہمارے پیارے اور مکرم نبی حضرت محمد صلی اللہ علیہ وسلم کے سچے عاشق اور مؤذنِ رسول جلیل القدر صحابی حضرت بلال بن رباح رضی اللہ عنہ تھے۔
یہ وہ تاریخی اور یادگار موقع تھا جب عادل خلیفہ امیر المؤمنین حضرت عمر بن خطاب رضی اللہ عنہ کے مبارک ہاتھوں سنہ 15 ہجری بمطابق سنہ 636ء میں مقبوضہ بیت المقدس کا تاریخی فتح نامہ رقم ہوا تھا۔
الشیخ عکرمہ صبری نے اسلامی رواداری کو اجاگر کرتے ہوئے مزید فرمایا کہ ہمارا عظیم دینِ اسلام دنیا کے دیگر آسمانی مذاہب کے پیروکاروں کی عبادات اور ان کی مذہبی رسومات میں کبھی بھی کسی قسم کی کوئی مداخلت نہیں کرتا بلکہ ان کے تحفظ اور احترام کی مکمل ضمانت فراہم کرتا ہے۔
انہوں نے غاصب صہیونی دشمن کی نسل کشی اور مظالم کا پردہ چاک کرتے ہوئے اس بات پر سخت زور دیا کہ قابض مقتدرہ کو یہ جھوٹا راگ الاپنے کا کوئی حق نہیں ہے کہ اذان کی روح پرور آواز سے کوئی خلل یا شور پیدا ہوتا ہے، حقیقت تو یہ ہے کہ اصل خلل اور جان لیوا شور تو خود ان غاصبوں کے ظلم و ستم کے ان مہیب جنگی ہتھیاروں، لڑاکا طیاروں، ٹینکوں، بلڈوزروں اور بارود کے ان بموں کا ہے جن سے فلسطینیوں پر ظلم کے پہاڑ توڑے جا رہے ہیں۔
