غرب اردن میں اسرائیلی فائرنگ، بچہ زخمی، بڑے پیمانے پر گرفتاریاں

غزب اردن – (روزنامہ قدس ـ آنلائن خبر رساں ادارہ) مغربی کنارے میں گذشتہ رات اور آج پیر کی صبح قابض افواج نے جارحیت اور چھاپہ مار کارروائیوں کا سلسلہ جاری رکھا، جس کے نتیجے میں بیت لحم میں ایک بچہ زخمی ہوا جبکہ مختلف علاقوں سے متعدد شہریوں کو گرفتار کر لیا گیا۔

بیت لحم میں شہر کے شمال میں واقع عایدہ کیمپ کے قریب اسلامی قبرستان کے پاس قابض افواج کی فائرنگ سے ایک 16 سالہ بچہ شدید زخمی ہو گیا۔

مقامی ذرائع نے بتایا کہ قابض اسرائیلی فوج نے عایدہ کیمپ میں واقع فوجی ٹاور سے اسلامی قبرستان کی جانب فائرنگ کی جس کے نتیجے میں بچہ گولی لگنے سے زخمی ہوا۔ ہلال احمر کے عملے نے زخمی بچے کو علاج کے لیے ہسپتال منتقل کیا جہاں اس کی حالت مستحکم بتائی جاتی ہے۔

قابض اسرائیلی افواج نے آج پیر کے روز فجر کے وقت مقبوضہ مغربی کنارے کے مختلف علاقوں میں چھاپہ مار کارروائیاں اور گرفتاریوں کی مہم جاری رکھی، جس کے نتیجے میں کم از کم 21 شہریوں کو گرفتار کیا گیا، جن میں سابق اسیران اور تین سگے بھائی بھی شامل ہیں۔ ان افراد کو ان کے گھروں پر چھاپوں، تلاشی اور اہل خانہ پر تشدد و تذلیل کے بعد حراست میں لیا گیا۔

گرفتاریوں کا یہ سلسلہ قلقيليہ، الخليل، رام اللہ، بیت لحم، طولکرم اور جنین کی گورنریوں میں مرکوز رہا، جہاں متعدد نوجوانوں اور سابق اسیران کو نشانہ بنایا گیا۔

قلقيلية میں قابض افواج نے شہر کے مشرق میں واقع قصبے کفر قدوم پر دھاوا بولا اور اسیر شادی جمعہ کے تین بھائیوں بدر، اسامہ اور لوئی جمعہ کو گرفتار کر لیا۔ گذشتہ دو ہفتوں کے دوران ان بھائیوں کی یہ چوتھی گرفتاری ہے۔ اس کے علاوہ کفر ثلث سے نوجوان امیر مراعبہ کو بھی حراست میں لیا گیا۔

جنین میں قابض افواج نے شہر کے جنوب مغرب میں واقع قصبے یعبد پر چھاپے کے دوران دو نوجوانوں یزید یوسف حمارشہ اور محمود احمد سلیم کو گرفتار کیا۔

طولکرم میں قابض افواج نے شہر کے جنوبی مضافاتی علاقے ارتاح سے دو نوجوانوں الیاس مزہر اور احمد عبدہ کو گرفتار کر لیا، جبکہ شہر کے جنوبی محلے میں امن چوک (دوار السلام) کے قریب ایک کیفے میں کئی نوجوانوں کو گھنٹوں محبوس رکھ کر ان سے فیلڈ انویسٹی گیشن کی گئی۔

رام اللہ اور البیرہ میں قابض افواج نے رام اللہ کے شمال مشرق میں واقع قصبے سلواد میں گھر پر چھاپہ مار کر عواد النجار کو گرفتار کیا، جبکہ کیمپ الجلزون کے نوجوان ایمن بہاء نخلہ کو اریحا کے مغرب میں "کرامیلو” چوراہے کے قریب سے گزرتے ہوئے حراست میں لیا گیا۔

بیت لحم میں شہر کے جنوب میں واقع قصبے الخضر پر چھاپے کے دوران دو نوجوانوں علاء عیسیٰ اور محمد جباریہ کو گرفتار کیا گیا۔

الخلیل میں قابض افواج نے گرفتاریوں کی وسیع مہم چلائی جس میں نو شہریوں کو نشانہ بنایا گیا، جن میں قصبہ بیت امر سے سابق اسیر وحید حمدی ابو ماریہ، حسن فواد ابو عیاش، شادی حاتم فوزی ابو عیاش اور یوسف اخلیل شامل ہیں۔

الخلیل کے مغرب میں واقع قصبے اذنا سے وسام جہاد طمیزہ، محمد عبد الغفار طمیزہ، احمد ذیب فرج اللہ اور ان کے بیٹے محمد کو گرفتار کیا گیا، جبکہ الخلیل کے جنوب میں واقع شہر دورا سے نوجوان مجاہد احمد خلیل رجوب کو حراست میں لیا گیا۔

دوسری جانب، اسیران میڈیا آفس نے اس بات کی تصدیق کی ہے کہ قابض اسرائیل فلسطینیوں، بالخصوص سابق اسیران اور اسیران کے اہل خانہ کے خلاف بڑے پیمانے پر گرفتاریوں کی پالیسی جاری رکھے ہوئے ہے۔ یہ سب کچھ اجتماعی سزا کی پالیسی اور مغربی کنارے کے مختلف علاقوں میں شہریوں پر دباؤ ڈالنے اور انہیں ہراساں کرنے کی مذموم کوششوں کا حصہ ہے۔