مقبوضہ مغربی کنارہ – (روزنامہ قدس ـ آنلائن خبر رساں ادارہ) مقبوضہ مغربی کنارے میں گذشتہ 48 گھنٹوں کے دوران مقبوضہ وطن کی آزادی کے لیے مزاحمتی سرگرمیاں پوری قوت سے جاری رہیں، جہاں مرکز معلومات فلسطین "معطی” نے مجموعی طور پر مزاحمت کی 17 کارروائیاں ریکارڈ کی ہیں۔ ان کارروائیوں میں قابض دشمن سے جھڑپیں، سنگ باری، غاصب صیہونی آبادکاروں کا مقابلہ، گاڑی کچلنے کی کوشش اور ایک احتجاجی مظاہرے کا انعقاد شامل ہے۔
مقبوضہ بیت المقدس گورنری میں ابو دیس اور کفر عقب کے قصبوں میں قابض دشمن کے ساتھ شدید جھڑپیں ہوئیں جن میں فلسطینی نوجوانوں نے غاصبوں پر جم کر پتھراؤ کیا۔
رام اللہ میں الامعری کیمپ اور المغير نامی قصبے میں غاصب صیہونیوں کے خلاف بھرپور عوامی مزاحمت اور سنگ باری کے واقعات پیش آئے۔
جنین میں یعبد کے مقام پر قابض دشمن کی جارحیت کے خلاف شدید احتجاجی جھڑپیں ہوئیں اور پتھراؤ کیا گیا۔
طوباس کے علاقے بردلا میں بھی جھڑپیں ریکارڈ کی گئیں جہاں فلسطینیوں نے غاصب صیہونی آبادکاروں کے حملوں کا دلیری سے مقابلہ کیا۔
نابلس شہر میں ایک عظیم الشان احتجاجی مظاہرے کا انعقاد کیا گیا جبکہ قصرہ کے قصبے میں سنگ باری اور تصادم کے واقعات رونما ہوئے۔
سلفیت کے قصبے حارس میں بھی غاصب دشمن کے خلاف عوامی غیظ و غضب دیکھنے کو ملا اور شدید سنگ باری کی گئی۔ بیت لحم میں سرنگوں والے نامی فوجی ناکے پر گاڑی سے کچلنے کی ایک جرات مندانہ کوشش ریکارڈ کی گئی۔
الخلیل میں ہریبہ النبی کے مقام پر غاصب صیہونی آبادکاروں کی غنڈہ گردی کا بھرپور جواب دیا گیا اور ان کا راستہ روکا گیا، جبکہ سعیر، حلحول اور اذنا کے علاقوں میں بھی قابض دشمن کے ساتھ شدید جھڑپیں اور سنگ باری کے واقعات پیش آئے۔
