مقبوضہ مغربی کنارہ – (روزنامہ قدس ـ آنلائن خبر رساں ادارہ) فلسطین انفارمیشن سینٹر "معطی” نے گذشتہ 48 گھنٹوں کے دوران مقبوضہ مغربی کنارے میں 22 مزاحمتی کارروائیاں ریکارڈ کی ہیں، جن میں قابض اسرائیلی دشمن کے ساتھ جھڑپیں، سنگ باری، آباد کاروں کا مقابلہ اور نائٹ کنفیوژن کی سرگرمیاں شامل ہیں۔ ان کارروائیوں کے نتیجے میں ایک قابض اسرائیلی فوجی زخمی ہوا۔
رام اللہ گورنری کے قصبے دیر عمار اور کفر مالک میں شدید جھڑپیں ہوئیں جن میں فلسطینی نوجوانوں نے قابض دشمن پر پتھراؤ کیا، جبکہ المغير قصبے میں بار بار ہونے والی جھڑپوں کے ساتھ ساتھ نائٹ کنفیوژن کی کارروائیاں کی گئیں اور بزدل آباد کاروں کے حملوں کا بھرپور دفاع کیا گیا۔
نابلس گورنری کے قصبے قصرہ کے علاقے راس العین میں نائٹ کنفیوژن کی سرگرمیاں اور آباد کاروں کا مقابلہ کیا گیا، اس کے علاوہ تلفیت اور اودلا کے قصبوں میں قابض دشمن کے ساتھ جھڑپیں ہوئیں جن میں سنگ باری کی گئی، جبکہ بیتا قصبے میں بھی جھڑپوں کے ساتھ ساتھ پتھراؤ کیا گیا اور آباد کاروں کو پسپا کیا گیا۔
طوباس میں حی الثغرہ کے مقام پر شدید جھڑپیں ہوئیں جہاں فلسطینیوں نے قابض اسرائیلی فوج اور اس کی فوجی گاڑیوں پر پتھراؤ کیا۔
بیت لحم گورنری کے قصبے تقوع میں بھی قابض دشمن کے ساتھ جھڑپیں ہوئیں جن کے دوران سنگ باری کی گئی۔
خلیل گورنری میں سعیر قصبے کے علاقے راس العاروض میں ہونے والی جھڑپوں کے نتیجے میں ایک قابض اسرائیلی فوجی زخمی ہو گیا، جبکہ العروب اور الفوار کیمپوں اور بیت امر قصبے میں بھی شدید جھڑپیں اور سنگ باری کے واقعات پیش آئے۔
یہ پیش رفت ایک ایسے وقت میں سامنے آئی ہے جب قابض اسرائیلی افواج کی جانب سے مغربی کنارے کے مختلف شہروں، قصبوں اور کیمپوں پر دھاووں میں تیزی لائی گئی ہے اور دوسری جانب آباد کاروں کے مسلح گروہوں کی جانب سے فلسطینیوں اور ان کی املاک پر منظم حملوں اور سفاکیت کا سلسلہ جاری ہے۔
