نیویارک (روزنامہ قدس ـ آنلائن خبر رساں ادارہ) اقوام متحدہ میں پاکستان کے مستقل مندوب عاصم افتخار نے مسئلہ فلسطین اور کشمیر کے پرامن حل کو عالمی قوانین کے تحت نہایت ضروری قرار دیا ہے۔
اقوام متحدہ میں تنازعات سے بچاؤ اور ان کے حل پر ہونے والے مباحثے سے خطاب میں عاصم افتخار نے کہا کہ بدقسمتی سے آج تک مسئلہ فلسطین اور کشمیر کا کوئی حتمی حل نہیں نکالا جا سکا۔ انہوں نے زور دیا کہ تمام تنازعات کو سیاسی اور سفارتی ذرائع سے حل کیا جانا چاہیے۔
پاکستانی مندوب نے گزشتہ روز سلامتی کونسل کے اجلاس میں بھی کہا تھا کہ تمام تنازعات پرامن طریقے سے حل ہونے چاہئیں۔ انہوں نے واضح کیا کہ پاکستان پرامن حل پر یقین رکھتا ہے اور عالمی قوانین کے مطابق ان مسائل کو حل کرنا عالمی برادری کی ذمہ داری ہے۔
