بیروت – (روزنامہ قدس ـ آنلائن خبر رساں ادارہ) قابض اسرائیلی جنگی طیاروں نے جنوبی لبنان کے بلدہ بریقا میں ایک گاڑی کو نشانہ بنا کر تباہ کر دیا، جبکہ لبنانی ذرائع نے صبح کے وقت جنوبی لبنان کے شہر الخیام میں زور دار دھماکے کی آواز سنی، جو بعد میں ایک گھر کے اطراف پر کیے گئے حملے کا نتیجہ ثابت ہوئی۔
ذرائع کے مطابق قابض اسرائیلی فضائیہ کے کواڈ کوپٹر طرز کے ڈرون نے شہر الخیام میں ایک زرعی فارم پر بم گرائے، جس کے نتیجے میں ایک گھر کے قریب واقع مرغیوں کا فارم مکمل طور پر تباہ ہو گیا، یہ کارروائی دھماکہ خیز مواد پھینک کر کی گئی۔
اسی دوران مغربی بقاع کے فضائی علاقے میں قابض اسرائیل کے ڈرون طیاروں کی کم بلندی پر شدید پرواز ریکارڈ کی گئی، جس کے باعث پورے علاقے میں خوف اور بے چینی کی کیفیت پائی جاتی ہے۔
قابض اسرائیل کی فوج نے پیر کی صبح اعلان کیا کہ اس نے اتوار کے روز جنوبی لبنان کے بلدہ الجمیجمہ کے قریب ایک فضائی حملے میں حزب اللہ کے دو ارکان کو شہید کیا ہے۔
فوجی بیان میں دعویٰ کیا گیا کہ یہ دونوں افراد حزب اللہ سے وابستہ عسکری ڈھانچوں کی بحالی کی کوششوں میں مصروف تھے۔
اتوار کے روز جنوبی لبنان میں قابض اسرائیلی بمباری کے نتیجے میں دو افراد شہید ہو گئے، جبکہ قابض فوج نے یہ اعلان بھی کیا کہ اس نے جنوبی علاقے میں حزب اللہ کے ایک رکن کو نشانہ بنایا، یہ سب کچھ سیز فائر معاہدے کے نفاذ کے باوجود جاری خلاف ورزیوں کے سلسلے کا حصہ ہے۔
لبنان کی وزارت صحت نے ایک بیان میں تصدیق کی کہ دو افراد اس وقت شہید ہوئے جب قابض اسرائیل کے ایک ڈرون نے بنت جبیل ضلع میں بلدہ خربہ سلم اور الجمیجمہ کو ملانے والی سڑک پر ایک گاڑی کو نشانہ بنایا۔
سیز فائر معاہدے کا مقصد لبنان پر قابض اسرائیلی جارحیت کا خاتمہ تھا، اکتوبر 2023ء میں شروع ہوئی اور سنہ ستمبر 2024ء میں ایک ہمہ گیر جنگ کی شکل اختیار کر گئی، اس جارحیت کے نتیجے میں چار ہزار سے زائد افراد شہید اور سترہ ہزار سے زیادہ زخمی ہوئے۔
لبنان میں اقوام متحدہ کی عبوری فورس یونيفيل کی رپورٹس کے مطابق قابض اسرائیل نے نومبر 2024ء کے اواخر میں معاہدے کے نفاذ کے بعد اب تک دس ہزار سے زائد خلاف ورزیاں کیں، جن کے باعث سیکڑوں لبنانی شہری شہید اور زخمی ہوئے جبکہ وسیع پیمانے پر مادی تباہی بھی ہوئی۔
اس کے باوجود قابض اسرائیل سیز فائر معاہدے کی کھلم کھلا خلاف ورزی کرتے ہوئے جنوبی لبنان کی پانچ پہاڑیوں پر اپنا قبضہ برقرار رکھے ہوئے ہے، جن پر اس نے گذشتہ جنگ کے دوران کنٹرول حاصل کیا تھا، اس کے علاوہ لبنان کے وہ دیگر علاقے بھی اب تک قابض اسرائیل کے زیر قبضہ ہیں جو دہائیوں سے اس کے تسلط میں ہیں۔
