خان یونس میں خیموں پر حملہ بین الاقوامی قانون کی خلاف ورزی ہے، حماس

غزہ ۔ روزنامہ قدس ـ آنلائن خبر رساں ادارہ

اسلامی تحریک مزاحمت ” حماس” نے اپنے بیان میں کہا ہے کہ قابض اسرائیل کی مجر م فوج نے جنوبی غزہ کے شہر خان یونس میں بے گھر فلسطینیوں کے خیموں اور کویت ہسپتال کے قریب اندھا دھند اور وحشیانہ بمباری کر کے معصوم بچوں سمیت متعدد شہریوں کو شہید اور زخمی کر دیا۔ یہ ہولناک حملہ ایک واضح جنگی جرم ہے اور سیز فائر معاہدے کی کھلی توہین ہے، جس سے قابض اسرائیل کی بدنیتی اور معاہدے کی ذمہ داریوں سے فرار کی کوشش سب کے سامنے آ گئی ہے۔

حماس نے اپنے اس بیان میں جس کی کاپی مرکزاطلاعات فلسطین کو موصول ہوئی قابض اسرائیل کی اس فاشسٹ جارحیت کی مکمل ذمہ داری دشمن ریاست پر ڈالتے ہوئے کہا کہ وہ اس سنگین اشتعال انگیزی کے تمام نتائج کی ذمہ دار ہے۔ حماس نے واضح کیا کہ ثالث ممالک اور ضامن قوتوں کی ذمہ داری ہے کہ وہ قابض اسرائیلی سفاکیت کو روکے اور جنگی مجرم بنجمن نیتن یاھو اور اس کی انتہا پسند حکومت کو معاہدے سے بھاگنے کی اجازت نہ دیں۔
بیان میں مزید کہا گیا کہ معاہدے کا بنیادی تقاضا یہ تھا کہ عام شہریوں، رہائشی علاقوں اور بے گھر فلسطینیوں کے خیموں پر بمباری بند کی جائے، مگر قابض اسرائیل نہ صرف یہ حملے جاری رکھے ہوئے ہے بلکہ ان میں اضافہ کر رہا ہے۔

بدھ کی شام خان یونس کے مغرب میں قابض اسرائیل کے جنگی طیاروں نے بے گھر فلسطینیوں کے ایک خیمے کو نشانہ بنایا جس کے نتیجے میں کئی شہری شہید اور زخمی ہوئے۔

ہمارے نامہ نگار کے مطابق بمباری کے بعد پانچ فلسطینی شہید ہوئے جن میں بچے بھی شامل ہیں جبکہ دس افراد زخمی ہوئے۔ یہ خیمہ کویتی ہسپتال کے قریب واقع تھا جسے دانستہ طور پر نشانہ بنایا گیا۔

قابض اسرائیل کی جارح افواج سیز فائر معاہدے کی مسلسل خلاف ورزی کر رہی ہیں جو گذشتہ سنہ 10 اکتوبر کو نافذ ہوا تھا۔ اس کے باوجود قابض فوج مختلف علاقوں میں وقفے وقفے سے بمباری، فائرنگ اور شہریوں کے گھروں کو دھماکوں سے اڑا کر سیز فائر کو عملی طور پر بے معنی بنا رہی ہے۔ غزہ کے عوام پر ڈھائے جانے والے یہ مظالم قابض اسرائیل کی نسل کشی کی اس پالیسی کا تسلسل ہیں جس نے پورے علاقے کو ملبے کے ڈھیر میں بدل دیا ہے۔