وسطی غزہ کے البریج کیمپ کے مشرقی علاقے میں آج جمعرات کے روز قابض اسرائیلی فوج کی فائرنگ سے ایک فلسطینی شہری شہید ہو گیا۔ یہ واقعہ اس وقت پیش آیا جب صہیونی افواج کی جانب سے مسلسل بمباری اور عمارتوں کی تباہی کے ذریعے جنگ بندی کی کھلی خلاف ورزی جاری ہے۔
مقامی ذرائع کے مطابق قابض اسرائیلی فوج نے ایک شہری پر اُس وقت گولیاں برسا دیں جب وہ البریج کے مشرق میں ایندھن کے لیے لکڑیاں جمع کر رہا تھا۔ گولیوں کی زد میں آکر وہ موقع پر ہی شہید ہو گیا۔
دوسری جانب قابض اسرائیلی توپ خانے نے خانیونس کے مشرقی علاقوں کو نشانہ بنایا جبکہ فضائیہ نے بھی اسی مقام پر کئی فضائی حملے کیے۔
اس کے ساتھ ہی قابض اسرائیلی افواج نے غزہ شہر کے مشرق میں متعدد شہری مکانات کو دھماکوں سے اُڑا دیا، جس سے کئی خاندان بے گھر ہو گئے۔
قابض اسرائیلی فوج کی جانب سے 10 اکتوبر سے نافذ جنگ بندی کی روزانہ خلاف ورزیاں جاری ہیں، جن کے نتیجے میں اب تک 241 فلسطینی شہری شہید اور 609 زخمی ہو چکے ہیں۔
جبکہ سنہ2023ء کے 7 اکتوبر سے شروع ہونے والے قابض اسرائیل کے جارحانہ حملوں کے نتیجے میں شہداء کی مجموعی تعداد بڑھ کر 68 ہزار 875 ہو چکی ہے، اور زخمیوں کی تعداد 1 لاکھ 70 ہزار 679 تک پہنچ گئی ہے۔
فلسطینی عوام پر یہ مسلسل جارحیت قابض اسرائیلی ریاست کی منظم نسل کشی، اجتماعی سزا اور جنگ بندی کی خلاف ورزیوں کا تسلسل ہے، جس کا مقصد غزہ کے مظلوم عوام کو ان کے حقِ آزادی سے محروم رکھنا ہے۔
