کولمبیا کا قابض اسرائیل سے تجارتی معاہدہ ختم، سفارت کار ملک بدر

(روزنامہ قدس ـ آنلائن خبر رساں ادارہ) کولمبیا کے صدر گوستاوو پیٹرو نے قاتل ناجائز ریاست اسرائیل کے ساتھ آزاد تجارتی معاہدے کو ختم کرنے کا اعلان کرتے ہوئے سفاک اسرائیلی سفارتکاروں کو فوری طور پر کولمبیا چھوڑنے کا حکم دیا ہے۔

صدر پیٹرو نے کہا کہ جنگی مجرم نیتن یاہو نے ایک نیا بین الاقوامی جرم انجام دیا ہے۔ انہوں نے مزید بتایا کہ گلوبل صمود فلوٹیلا میں شامل دو کولمبیائی شہری بین الاقوامی پانیوں سے گرفتار کر لیے گئے ہیں۔

صدر پیٹرو نے پہلے ہی خبردار کیا تھا کہ اگر قابض اسرائیل اس انسانی کارواں پر حملہ کرتا ہے جو غزہ کی پٹی کے لیے روانہ ہوا ہے تو یہ بین الاقوامی قوانین کی صریح ًخلاف ورزی اور انسانیت کے خلاف جرم شمار ہوگا۔

انہوں نے بتایا کہ گلوبل صمود فلوٹیلا انتہائی خطرناک علاقے میں داخل ہو چکا ہے، فضا میں ڈرونز کی سرگرمیاں بڑھ رہی ہیں اور نامعلوم کشتیوں کو ریڈار پر دیکھا جا رہا ہے۔

صدر نے زور دیا کہ کارواں میں شامل پانچ سو زائد غیرملکی شہریوں اور رضاکاروں کی جان اور عزت کا مکمل احترام کیا جائے۔

پیٹرو نے یاد دلایا کہ اس قافلے میں دو کولمبیائی شہری مانویلا پیڈیویا اور لونا باریٹو بھی شامل ہیں جن کی حفاظت سب سے اہم ترجیح ہونی چاہیے۔