چین : غزہ فلسطینی سرزمین کا اٹوٹ حصہ ہے

(روزنامہ قدس ـ آنلائن خبر رساں ادارہ) چین کی وزارت خارجہ کے ترجمان گوہ جیا کون نے واضح الفاظ میں کہا ہے کہ غزہ فلسطینی عوام کی ملکیت ہے اور یہ فلسطین کی سرزمین کا ایک ناقابلِ تقسیم حصہ ہے۔

انہوں نے اس بات پر زور دیا کہ غزہ فلسطینی عوام کا ہے اور ان کی سرزمین کا ایک لازمی جزو ہے۔ ان کا کہنا تھا کہ فوری طور پر غزہ میں مکمل جنگ بندی ہونی چاہیے اور انسانی بحران کو کم کرنے کے لیے عملی اقدامات ناگزیر ہیں۔

امریکہ کی طرف اشارہ کرتے ہوئے چینی ترجمان نے کہا کہ جس ملک کا قابض اسرائیل پر خصوصی اثر و رسوخ ہے اسے اپنی ذمہ داریاں پوری کرنی چاہئیں۔

انہوں نے اس بات کی بھی تصدیق کی کہ چین عالمی برادری کے ساتھ مل کر غزہ میں جنگ بندی کے قیام، فلسطینی عوام کے جائز قومی حقوق کی بحالی اور مسئلہ فلسطین کے ایک منصفانہ، جامع اور پائیدار حل کے لیے کام کرنے کو تیار ہے۔