وزیراعظم: اسرائیلی ڈھٹائی بند کی جائے، قطر پر حملہ علاقائی سالمیت کی خلاف ورزی ہے

(روزنامہ قدس ـ آنلائن خبر رساں ادارہ) وزیر اعظم محمد شہباز شریف نے قطر کی قیادت کو قابض اسرائیل کی بلا جواز اشتعال انگیزی کے خلاف پاکستان کی طرف سے مکمل یکجہتی اور حمایت کا یقین دلاتے ہوئے کہا ہے کہ مشرق وسطیٰ میں سفاکانہ اسرائیل کی ڈھٹائی سے جاری جارحیت کو روکنا ہوگا۔انہوں نے کہا کہ قطر پر حملہ اس کی خودمختاری اور علاقائی سالمیت کی خلاف ورزی ہے امت کو اتحاد کا مظاہرہ کرنا ہوگا۔

وزیراعظم نے اپنے ایک روزہ سرکاری دورہ قطر کے موقع پرامیر قطر شیخ تمیم بن حمد الثانی سے ملاقات کی، انہوں نے صہیونی حملے پر دوحا حکومت سے اظہارِ یکجہتی اور قیمتی جانوں کے ضیاع پر اظہارِ افسوس کیاانہوں نے مزید کہا کہ مشکل وقت میں آپ کیساتھ کندھے سے کندھا ملائے کھڑے ہیں۔

شیخ تمیم کا شہباز شریف سے اظہارِ تشکر، دونوں رہنماؤں کا ملاقات میں علاقائی امن کو فروغ دینے، بین الاقوامی قانون کی پاسداری اور فلسطینی عوام کے جائز حقوق کی حمایت میں قریبی ہم آہنگی برقرار رکھنے پر بھی اتفاق ۔

دوسری جانب قطر نے جابرانہ اسرائیلی حملے کے بعد عرب اور اسلامی ممالک کا ہنگامی اجلاس اتوار کو طلب کرلیا ہے۔