(روزنامہ قدس ـ آنلائن خبر رساں ادارہ) قابض اسرائیلی افواج کی جانب سے عائد کردہ شدید ترین پابندیوں، مقبوضہ بیت المقدس اور اس کے قدیم شہر کے محاصرے اور مسجد اقصیٰ کے گرد آہنی رکاوٹیں کھڑی کیے جانے کے باوجود ہزاروں فلسطینیوں نے اپنی جانوں کو خطرے میں ڈال کر قبلہ ء ا ول میں حاضری دی اور جمعہ کی نماز ادا کی۔
یروشلم کے اسلامی اوقاف کے مطابق چالیس ہزار فلسطینی نمازیوں نے مسجد اقصیٰ کے احاطے میں نمازِ جمعہ میں شرکت کی۔ اس موقع پر انہوں نے غزہ اور مغربی کنارے میں شہید ہونے والے اپنے فلسطینی بھائیوں اور بہنوں کے لیے خصوصی دعائیں بھی کیں۔
نمازِ جمعہ سے قبل قابض اسرائیلی فوج نے بیت المقدس شہر کے داخلی راستوں، قدیم شہر کے اطراف اور مسجد اقصیٰ کے چاروں جانب سخت ناکہ بندی کر رکھی تھی۔ نمازیوں کو مسجد تک پہنچنے سے روکنے کے لیے سینکڑوں کی تعداد میں لوہے کی رکاوٹیں نصب کی گئی تھیں۔
قابض فوجی اہلکاروں نے مسجد اقصیٰ کی جانب آنے والے نمازیوں خاص طور پر نوجوانوں کو روک کر ان کی جامہ تلاشی لی ان کے شناختی کارڈ قبضے میں لیے اور ایک بڑی تعداد کو زبردستی مسجد میں داخل ہونے سے روک دیا۔
