(روزنامہ قدس ـ آنلائن خبر رساں ادارہ) جبالیہ کے علاقے میں پانی بھرنے کی غرض سے جانے والی ایک ننھی فلسطینی بچی کو قابض اسرائیل کے ڈرون نے بم سے نشانہ بنا کر شہید کر دیا، جس کے دل دہلا دینے والے مناظر نے پوری انسانیت کو جھنجھوڑ دیا۔ الجزیرہ ٹی وی پر نشر ہونے والی تصویری مناظر میں دیکھا جا سکتا ہے کہ یہ بچی چند لمحے پہلے تک زندگی سے بھری حرکت میں تھی مگر پھر اچانک ایک صہیونی میزائل نے اسے براہ راست نشانہ بنایا اور اس کی معصوم روح پرواز کر گئی۔
الجزیرہ کے نامہ نگار مؤمن شُرافی نے بتایا کہ یہ بچی جو بھوک اور پیاس سے نڈھال تھی، محض اپنی پیاسی ماں بہنوں کے لیے پانی بھرنے نکلی تھی تاکہ گھر واپس لوٹ سکے مگر قابض سفاک ریاست اسرائیل کی ڈرون نے اسے اسی وقت شہید کر دیا۔ انہوں نے کہا کہ ایک بچی کا یہ اندوہناک قتل دراصل ان سیکڑوں ہولناک مناظر میں سے محض ایک مثال ہے جو قابض اسرائیل کی درندگی اور شہریوں کے خلاف اس کے جنگی جرائم کو بے نقاب کرتے ہیں۔
شُرافی نے مزید انکشاف کیا کہ گذشتہ دنوں شمالی غزہ کے محلہ الشجاعیہ میں فلسطینی نوجوان اپنے بھائی کی لاش ملبے سے نکالنے کی کوشش کر رہے تھے کہ قابض اسرائیل کی ڈرون نے انہیں نشانہ بنایا اور وہ سب شہید ہوگئے۔ انہوں نے کہا کہ اکثر کیمروں میں یہ مناظر محض اتفاقاً قید ہو جاتے ہیں جو قابض اسرائیل کی جاری نسل کشی کی اصل ہولناکی کو دنیا کے سامنے لانے کا ذریعہ بنتے ہیں۔
واضح رہے کہ گذشتہ جون میں بھی الجزیرہ نے ایک خصوصی ویڈیو حاصل کی تھی جس میں دکھایا گیا کہ قابض اسرائیل کی ڈرون نے ایک فلسطینی کو براہ راست نشانہ بنایا جو اپنی پیٹھ پر آٹے کی بوری لادے سڑک پر جا رہا تھا۔ وہ نوجوان بالکل عام انداز میں گلی سے گزر رہا تھا کہ اچانک ایک خوفناک دھماکے نے اس کی زندگی کا چراغ گل کر دیا۔ اس کی لاش وہیں گر گئی اور اس کے پہلو میں آٹے کی بوری پڑی رہ گئی جسے وہ اپنے گھر والوں کے لیے لے جا رہا تھا۔
