(روزنامہ قدس ـ آنلائن خبر رساں ادارہ)عالمی فوج داری عدالت کو جنگی جرائم اور انسانیت کے خلاف جرائم میں مطلوب قابض اسرائیلی وزیر اعظم بنجمن نیتن یاھو نے اتوار کے روز ایک پریس کانفرنس میں انتہائی ڈھٹائی اور بے شرمی کے ساتھ غزہ میں جاری نسل کشی اور بھوک کو یکسر جھٹلا دیا۔
یہ بیان ایسے وقت میں دیا گیا جب عالمی خبر رساں ایجنسیوں کی تصاویر میں غزہ کے وہ معصوم بچے دنیا کے سامنے آ رہے ہیں جنہیں بھوک نے ہڈیوں کا ڈھانچہ بنا دیا ہے۔ نیتن یاھو ان دردناک مناظر کو جعلی قرار دیتے ہیں لیکن ان کا یہ سفید جھوٹ اس وقت زمین بوس ہو جاتا ہے جب روز بروز مزید تصاویر سامنے آتی ہیں اور غزہ میں قحط اپنی ہولناک ترین سطح تک پہنچتا جا رہا ہے۔
ایک تصویر میں امیرہ مطیر اپنے پانچ ماہ کے ننھے بیٹے عمار کو تھامے ہوئے ہیں، جس کا جسم شدید غذائی قلت کے باعث سوکھ کر کمزور ہو چکا ہے۔ یہ تصویر پانچ اگست کو لی گئی۔
ایک اور دل دہلا دینے والے منظر میں ایک ماں اپنے اس بچے کو گود میں لیے کھڑی ہے جسے بھوک نے گوشت سے خالی کر کے محض ایک ہڈیوں کے ڈھانچے میں بدل دیا ہے۔
بین الاقوامی انسانی حقوق کی تنظیموں اور عرب و عالمی میڈیا کی رپورٹوں نے تصدیق کی ہے کہ قابض اسرائیل کے مسلط کردہ محاصرے نے غزہ میں قحط کو شدید ترین سطح تک پہنچا دیا ہے۔
غزہ کی وزارت صحت نے آج اپنے تازہ اعداد و شمار جاری کرتے ہوئے بتایا کہ جنگ کے آغاز سے اب تک بھوک اور غذائی قلت کے باعث شہید ہونے والوں کی تعداد بڑھ کر 217 ہو گئی ہے جن میں سے 100 بچے ہیں۔
ایک اور تصویر میں نو سالہ مریم عبدالعزیز دواس غزہ شہر کے ایک پناہ گزین مرکز میں بستر پر لیٹی ہے۔ اس کے کمزور بدن سے ہڈیاں نمایاں ہو چکی ہیں، یہ اس سنگین غذائی قلت کی ایک اور زندہ مثال ہے جو غزہ کے بچوں پر مسلط کی گئی ہے۔
