(روزنامہ قدس ـ آنلائن خبر رساں ادارہ) پاکستان کے مستقل مندوب عاصم افتخار نے مشرق وسطیٰ سے متعلق سلامتی کونسل کے اجلاس سے خطاب میں کہا کہ معصوم ونہتے فلسطینی سفاک صہیونی جارحیت کا سامنا کررہے ہیں جسے ختم کرنے کے لیےسلامتی کونسل فل فور اقدام کرے۔
پاکستانی مندوب نے کہا کہ قابض اسرائیل کی فلسطینیوں پر مسلط کی گئی نسل کش جنگ میں غزہ کے عام شہریوں کو تباہ کن صورتحال کاسامنا ہے۔ عاصم افتخار نے مزید کہا کہ ظالم صہیونی فوج کی درندگی ، قحط کی پالیسی اور غزہ کےجابرانہ محاصرےکو کسی صورت درست قرار نہیں دیا جاسکتا۔
انہوں نے کہا کہ یہ اقدامات نہ صرف اخلاقی طور پر قابلِ مذمت ہیں بلکہ بین الاقوامی قانون بشمول جنیوا کنونشنز کی سنگین خلاف ورزیاں ہیں اور بین الاقوامی عدالتِ انصاف کے جاری کردہ پابند احکامات کی کھلی خلاف ورزی کے مترادف ہیں۔
