شمالی اردن میں صہیونی آبادکاروں کا حملہ، ایک سو سترہ بھیڑیں جاہ بحق

(روزنامہ قدس ـ آنلائن خبر رساں ادارہ) فلسطین کی سرزمین پر ظلم و جبر اب صرف انسانوں تک محدود نہیں رہا بلکہ اب قابض اسرائیل کے وحشی آبادکار بے زبان جانوروں پر بھی ظلم ڈھا رہے ہیں۔ گذشتہ شب شمالی اَغوار کے علاقے "الشق” میں صہیونی شدت پسندوں نے درندگی کی ایک نئی مثال قائم کرتے ہوئے ایک سو سترہ بے زبان بھیڑوں کو چھریوں اور گولیوں کے ذریعے بے دردی سے مار ڈالا۔

مقامی ذرائع کے مطابق یہ واقعہ گاؤں "المالح” کے قریب پیش آیا، جہاں قابض ریاست کے مسلح درندہ صفت آبادکاروں نے فلسطینی چرواہوں کے مویشی چرا لیے اور جنہیں ساتھ نہ لے جا سکے انہیں قتل کر کے وہیں چھوڑ دیا۔

یہ ظلم رات کی تاریکی میں برپا ہوا۔صہیونی آبادکاروں نے نہ صرف فلسطینی دیہاتیوں کے خیموں پر دھاوا بولا بلکہ ان پر حملہ کرکے ان کے قیمتی جانوروں کو یا تو چرا لے گئے یا موت کے گھاٹ اتار دیا۔

یہ واقعہ محض جانوروں کی ہلاکت نہیں بلکہ قابض اسرائیل کی اُس نسل پرستی اور مجرمانہ سوچ کا عکس ہے جو فلسطینی وجود کو ہر شکل میں مٹانا چاہتی ہے۔ کبھی انسانوں کو نشانہ بنایا جاتا ہے، کبھی ان کے مکانات کو مسمار کیا جاتا ہے، اور کبھی ان کے معاشی وسائل حتیٰ کہ ان کے مویشی تک صہیونی ظلم و نفرت سے محفوظ نہیں۔