نابلس: صہیونی فوج کی فائرنگ سے دو فلسطینی نوجوان شہید

(روزنامہ قدس ـ آنلائن خبر رساں ادارہ)قابض اسرائیلی فوج نے نابلس کے مشرقی علاقے سالم میں ایک اور فلسطینی گھر اجاڑ دیا۔ وزارتِ صحت نے تصدیق کی ہے کہ سینتیس سالہ فلسطینی نوجوان وسام غسان حسن اشتیہ غاصب فوج کی گولیوں کا نشانہ بن کر جامِ شہادت نوش کر گیا جب کہ اس کا جسد خاکی بھی صہیونی فوج نے قبضے میں لے رکھا ہے۔

یہ واقعہ اس وقت پیش آیا جب قابض فوج نے مشرقی سالم گاؤں پر دھاوا بولتے ہوئے دو گھروں کا محاصرہ کر لیا اور اندھا دھند فائرنگ شروع کر دی۔ اسی درندگی کے نتیجے میں تئیس سالہ نوجوان قصی ناصر محمود نصار بھی شہید ہوا جسے زخمی حالت میں رفیدیا ہسپتال لے جایا گیا مگر وہ جانبر نہ ہو سکا۔

اسی دوران صہیونی فوج نے زخمی حالت میں وسام اشتیہ کو بھی گرفتار کر لیا اور بعد ازاں اس کی شہادت کی اطلاع دی گئی۔ ایک باسٹھ سالہ شہری بھی اس حملے میں شدید زخمی ہوا جسے فلسطینی ہلالِ احمر کے عملے نے فوری طبی امداد کے لیے ہسپتال منتقل کیا۔

آج کے دن نابلس کے مشرقی علاقے سالم میں قابض افواج کے اس وحشیانہ حملے نے ثابت کر دیا کہ فلسطینیوں کی جان و مال قابض قوتوں کی آنکھوں میں رتی برابر وقعت نہیں رکھتے۔ اہلِ علاقہ اور نوجوانوں نے جب مزاحمت کی تو قابض صہیونی فوج نے براہِ راست گھروں اور افراد کو نشانہ بنایا جس کے نتیجے میں جھڑپیں بھی ہوئیں اور غاصب کمک بھی علاقے میں پہنچ گئی۔

یہ افسوسناک واقعہ ایک ایسے وقت میں پیش آیا ہے جب پورے مغربی کنارے بشمول القدس، قابض فوج اور صیہونی آبادکاروں کے حملوں کی زد میں ہے۔ فلسطینی اعدادوشمار کے مطابق ان حملوں کے نتیجے میں اب تک ایک ہزار کے قریب فلسطینی شہید ہو چکے ہیں، سات ہزار سے زیادہ زخمی ہیں اور اٹھارہ ہزار سے زائد کو گرفتار کیا جا چکا ہے۔

واضح رہے کہ 2023 کے ساتھ اکتوبر سے غزہ میں قابض اسرائیل نے امریکہ کی سرپرستی میں جو نسل کشی کی جنگ مسلط کر رکھی ہے اس میں اب تک ایک لاکھ ترانوے ہزار سے زائد فلسطینی شہید اور زخمی ہو چکے ہیں۔ ان میں اکثریت خواتین اور بچوں کی ہے جب کہ گیارہ ہزار سے زائد افراد لاپتہ اور لاکھوں لوگ بے گھر ہو چکے ہیں۔ قحط، تباہی، ہجرت اور بربادی کی اس آگ نے پورے فلسطین کو اپنی لپیٹ میں لے لیا ہے۔