ایران پر اسرائیلی حملے غیرقانونی ہیں:امریکی سینیٹر

(روزنامہ قدس ـ آنلائن خبر رساں ادارہ)امریکی سینیٹر برنی سینڈرز نےقابض اسرائیلی وزیراعظم بنیامین نتانیاہو کے ایران پر یکطرفہ حملے کو “غیرقانونی اور اشتعال انگیز” قرار دیتے ہوئےکہا کہ امریکا کو اسرائیل کی ایک اور جنگ میں گھسیٹا نہیں جاسکتا، ایران کے نیو کلیئر پروگرام پر مذاکرات اتوار کو طے تھے، خود صدر ٹرمپ نے یہ مذاکرات نتیجہ خیز ہونے کا امکان بھی ظاہر کیا تھا ، ایسے میں نیتن یاہو نے حملہ کر دیا اور سب کچھ برباد کر دیا۔

انہوں نے کہا کہ نیتن یاہو نے جنگ بندی کے سب سے بڑے مذاکرات کار کو مار دیا اور امریکا کی سفارتکاری کو نیچا دکھایا ہے، ایسے میں امریکا کو اسرائیل کی ایک اور جنگ میں گھسیٹا نہیں جاسکتا۔

امریکی سینیٹر نے کہا کہ نیتن یاہو نے ہزاروں شہریوں کی جانوں کو خطرے میں ڈالا ہے ۔برنی سینڈرز نے غزہ میں بچوں کو بھوکا رکھنے کی اسرائیلی پالیسی کو جنیوا کنونشنز کی سنگین خلاف ورزی قرار دیا، اور کہا کہ اب ایران پر حملہ کرکے نتانیاہو پورے خطے کو جنگ کی آگ میں جھونکنے کی کوشش کر رہا ہے۔