( روزنامہ قدس ـ آنلائن خبر رساں ادارہ)غزہ میں قابض اسرائیلی افواج کی نسل کشی رک نہ سکی۔ وزارت صحت کے مطابق گزشتہ 24 گھنٹوں میں اسرائیلی بمباری سے 70 نہتے فلسطینی، جن میں خواتین اور بچے شامل ہیں، شہید اور 189 زخمی ہوئے۔
شہدا میں دو افراد کی لاشیں کئی روز بعد ملبے سے برآمد کی گئیں۔7 اکتوبر 2023 سے اب تک اسرائیلی حملوں میں شہدا کی مجموعی تعداد 54,677 اور زخمیوں کی تعداد 125,530 ہو چکی ہے۔ صرف 18 مارچ 2025 سے اب تک، اسرائیل کی تازہ کارروائیوں میں 4,402 فلسطینی شہید اور 13,489 زخمی ہو چکے ہیں۔
وزارت صحت کے مطابق کئی لاشیں اب بھی تباہ شدہ عمارتوں کے ملبے اور سڑکوں پر موجود ہیں، جن تک مسلسل بمباری کے باعث امدادی ٹیمیں پہنچنے سے قاصر ہیں۔ اسرائیل نے 19 جنوری 2025 سے نافذ جنگ بندی معاہدہ 18 مارچ کو توڑ کر ایک بار پھر خونریزی شروع کی، جس کا نشانہ عام فلسطینی شہری بن رہے ہیں۔
