(روز نامہ قدس ۔آنلائن خبر رساں ادارہ) غزہ کی وزارت صحت کے مطابق، غیر قانونی صیہونی ریاست اسرائیل کے تازہ ترین فضائی اور زمینی حملوں میں گزشتہ 24 گھنٹوں کے دوران 107 فلسطینی شہید اور 247 زخمی ہو چکے ہیں۔ 7 اکتوبر 2023 سے جاری اس جارحیت میں اب تک شہداء کی مجموعی تعداد 53,762 جبکہ زخمیوں کی تعداد 122,197 تک پہنچ چکی ہے۔ صرف 18 مارچ 2025 سے اب تک 3,613 فلسطینی شہید اور 10,156 زخمی ہوئے ہیں، جن میں بڑی تعداد خواتین، بچوں اور بزرگوں کی ہے۔
جمعرات کے روز غزہ کے مختلف علاقوں پر بمباری اور گولہ باری کا سلسلہ دن بھر جاری رہا۔ خان یونس، دير البلح، شمالی غزہ اور بیت لاہیا سمیت کئی مقامات پر رہائشی علاقوں، خیمہ بستیوں، ہسپتالوں اور مساجد کو نشانہ بنایا گیا۔ شمالی غزہ میں العودہ ہسپتال پر حملے کے دوران نہ صرف عمارت کو نقصان پہنچا بلکہ ایندھن اور طبی امداد کے ذخائر بھی تباہ کر دیے گئے۔ ہسپتال کے اندر موجود صیہونی افواج کی اندھا دھند فائرنگ نے صورتحال کو مزید خطرناک بنا دیا۔
خان یونس، الصفطاوی، التفاح، نصیرات اور الفخاری جیسے علاقوں میں بھی اسرائیلی بمباری کے نتیجے میں بچوں، ماؤں اور بزرگوں سمیت درجنوں افراد جان کی بازی ہار چکے ہیں۔ کئی علاقوں میں ملبے تلے اب بھی لاشیں دبی ہوئی ہیں، جبکہ شہری دفاع اور ایمبولینس کے عملے کو مسلسل حملوں کے باعث متاثرین تک پہنچنے میں شدید مشکلات کا سامنا ہے۔ صرف آج کے دن کے دوران 50 سے زائد اموات رپورٹ کی گئی ہیں۔
وزارت صحت کے مطابق شہید ہونے والے بچوں کی مجموعی تعداد 16,503 ہو چکی ہے، جو اس المناک صورتحال کی سنگینی کو ظاہر کرتی ہے۔ غیر قانونی صیہونی ریاست کی جانب سے جاری اس انسانیت سوز جارحیت نے غزہ کو مکمل انسانی بحران میں دھکیل دیا ہے، جبکہ عالمی برادری اب بھی مؤثر اقدام سے گریزاں نظر آتی ہے۔