غزہ پر صیہونی بمباری: قطر کا شدید ردعمل، نیتن یاہو جنگ بندی میں سنجیدہ نہیں ، قطری وزیراعظم

امریکی نشریاتی ادارے "سی این این” کو دیے گئے انٹرویو میں ان کا کہنا تھا کہ حالیہ حملے ظاہر کرتے ہیں کہ اسرائیل کو جنگ بندی میں کوئی دلچسپی نہیں۔ انہوں نے امریکی شہری عیدان الیگزینڈر کی رہائی کو مثبت قدم قرار دیا، لیکن افسوس ظاہر کیا کہ اسرائیل نے اسی وقت اجتماعی بمباری کر کے مذاکراتی کوششوں کو سبوتاژ کیا۔

الشیخ محمد کا کہنا تھا کہ تنازع کی اصل جڑ اسرائیل کا فلسطینی اور شامی علاقوں پر قبضہ ہے، اور جب تک وہ سنجیدگی سے جنگ بندی کی جانب نہیں بڑھتا، مذاکرات صرف ایک دھوکہ ہوں گے۔

انہوں نے بتایا کہ قطر نے اسرائیلی حکام کو واضح پیغام دیا ہے کہ فوری، سنجیدہ اور نتیجہ خیز مذاکرات کا آغاز ناگزیر ہے، تاہم موجودہ حالات میں کسی بڑی پیش رفت کی امید نہیں کی جا سکتی۔

غزہ میں انسانی بحران پر بات کرتے ہوئے انہوں نے کہا کہ وہاں نئی منصوبہ بندی کے بجائے اقوام متحدہ کو مکمل رسائی دی جائے۔ انہوں نے بتایا کہ قطر کو تاحال امریکہ سے کوئی باضابطہ امدادی منصوبہ موصول نہیں ہوا، صرف میڈیا رپورٹس ہی سامنے آئی ہیں۔

انہوں نے زور دیا کہ اقوام متحدہ کو غزہ میں آزادانہ امدادی سرگرمیوں کی اجازت دی جائے تاکہ انسانی بحران پر قابو پایا جا سکے۔