مصری دارالحکومت میں مزاحمتی تحریک حماس اور مصری حکام کے درمیان جنگ بندی کےلئے اہم مذاکرات جاری

حماس نے جاری کردہ بیان میں کہا ہے کہ مذاکرات میں غزہ سے صیہونی انخلاء، مکمل جنگ بندی، جنگ زدہ علاقوں کی تعمیر نو، اور قیدیوں کے تبادلے جیسے اہم نکات شامل ہیں۔ وفد نے زور دیا ہے کہ غزہ میں جاری انسانی بحران، بھوک، ادویات کی کمی اور امدادی سامان کی بندش فوری توجہ کا تقاضا کرتی ہے، اور عالمی برادری کو مداخلت کرتے ہوئے اس پٹی کو بنیادی سہولیات کی فراہمی یقینی بنانی چاہیے۔

مذاکراتی عمل میں ایک ایسی کمیونٹی سپورٹ کمیٹی کی تشکیل پر بھی غور کیا جا رہا ہے جو غزہ کے انتظامات کو سنبھال سکے۔ وفد کے مطابق، تحریک نے ایک متوازن لائحہ عمل پیش کیا ہے جس میں طویل المدتی جنگ بندی، قیدیوں کی مکمل رہائی، غزہ سے مکمل صیہونی انخلا، اور ایسی انتظامیہ کی تشکیل شامل ہے جو قومی اور علاقائی اتفاق رائے سے قائم ہو۔ ذرائع کے مطابق، قطر اور مصر کی طرف سے پیش کردہ نئی تجویز میں پانچ سے سات سالہ جنگ بندی اور قیدیوں کے جامع تبادلے کا خاکہ شامل ہے۔

حماس کے نمائندے نے اس بات پر زور دیا کہ تحریک جزوی معاہدوں کے حق میں نہیں، جو صرف صیہونی ریاست کو وقتی فائدہ پہنچائیں، بلکہ ایک ایسے مکمل معاہدے کی تلاش میں ہے جو نہ صرف جنگ کا اختتام کرے بلکہ فلسطینیوں کو آزاد اور باوقار زندگی کی ضمانت بھی دے۔ یاد رہے کہ جنوری میں ہونے والی جنگ بندی 18 مارچ کو ایک بار پھر صیہونی حملوں کے بعد ختم ہو چکی ہے، اور اس وقت تک غزہ میں 51,000 سے زائد فلسطینی شہید و زخمی ہو چکے ہیں، جن میں بڑی تعداد خواتین اور بچوں کی ہے۔