قطر غزہ جنگ بندی معاہدے کی بحالی کے لیے پرعزم ہے: قطری وزیر
قطر کے وزیر مملکت برائے خارجہ امور محمد الخلیفی نے کہا ہے کہ دوحہ، غزہ سے متعلق جنگ بندی معاہدے کی بحالی کے لیے کوششیں جاری رکھے ہوئے ہے اور تمام تر رکاوٹوں کے باوجود اس عمل سے وابستہ ہے۔
فرانسیسی خبررساں ادارے اے ایف پی سے گفتگو کرتے ہوئے انہوں نے مذاکرات کی سست روی پر مایوسی کا اظہار کرتے ہوئے کہا کہ "یہ ایک انسانی مسئلہ ہے، جہاں قیمتی جانیں خطرے میں ہیں۔”
الخلیفی نے غیر قانونی صیہونی ریاست کے وزیراعظم نیتن یاہو کی جانب سے قطر پر تنقید کو "زیادہ تر محض شور شرابہ” قرار دیا اور امریکی جامعات میں قطر پر "تحریکِ بغاوت” پھیلانے کے الزامات کو بھی مسترد کر دیا۔
ادھر، قطر کے امیر شیخ تمیم بن حمد آل ثانی نے روسی صدر ولادیمیر پیوٹن سے ملاقات میں کہا کہ غیر قانونی صیہونی ریاست نے جنوری میں ہونے والے جنگ بندی معاہدے کی پاسداری نہیں کی۔ انہوں نے کہا کہ قطر فلسطینی عوام کی تکالیف کے خاتمے کے لیے فریقین کے درمیان مفاہمت کی کوششیں جاری رکھے گا۔
دوسری جانب، غیر قانونی صیہونی ریاست کی افواج 7 اکتوبر 2023 سے اب تک غزہ پر زمینی، فضائی اور بحری حملے جاری رکھے ہوئے ہیں، جن میں اب تک 51,201 فلسطینی شہید ہو چکے ہیں، جن میں بڑی تعداد خواتین اور بچوں کی ہے، جب کہ زخمیوں کی تعداد 116,869 سے تجاوز کر چکی ہے۔ ہزاروں لاشیں تاحال ملبے تلے دبی ہوئی ہیں۔