(روز نامہ قدس ۔آنلائن خبر رساں ادارہ) اقوام متحدہ کی ایجنسی برائے فلسطینی پناہ گزینوں "اونروا” نے انکشاف کیا ہے کہ غیر قانونی صیہونی ریاست اسرائیل کی شمالی مغربی کنارے میں جاری فوجی جارحیت "1967 کی جنگ کے بعد سے اب تک کی سب سے بڑی آبادی کی نقل مکانی” کا سبب بنی ہے۔
یہ صورتحال اس وقت سامنے آئی ہے جب غیر قانونی صیہونی ریاست اسرائیل کی افواج 21 جنوری سے شمالی مغربی کنارے کے کیمپوں، قصبوں اور شہروں پر جارحیت جاری رکھے ہوئے ہیں۔
جمعے کے روز اپنے ایک بیان میں، اونروا نے سوشل میڈیا پلیٹ فارم "ایکس” پر کہا:”شمالی مغربی کنارے میں غیر قانونی صیہونی ریاست اسرائیل کی جاری فوجی کارروائی نے 1967 کی جنگ کے بعد سے اب تک کی سب سے بڑی نقل مکانی کو جنم دیا ہے۔”
5 جون 1967 کو غیر قانونی صیہونی ریاست اسرائیل اور عرب ممالک (مصر، شام، اردن، عراق) کے درمیان جنگ چھڑ گئی تھی، جس میں الجزائر، لبنان، سعودی عرب اور کویت نے مالی، عسکری اور فنی تعاون فراہم کیا تھا۔ اُس وقت فلسطین کا وہ حصہ جو 1948 میں غیر قانونی صیہونی ریاست کے قبضے سے محفوظ رہا تھا، دو عرب ممالک کے انتظام میں تھا — غزہ مصر کے زیرانتظام جبکہ مغربی کنارہ، بشمول مشرقی بیت المقدس، اردن کے زیرانتظام تھا۔
چھ روزہ اس جنگ، جسے عرب دنیا میں "النكسة” یعنی شکست بھی کہا جاتا ہے، کے دوران غیر قانونی صیہونی ریاست اسرائیل نے مغربی کنارہ، غزہ، مصر کی سینائی جزیرہ نما، اور شام کی گولان کی پہاڑیاں قبضے میں لے لیں۔ مؤرخین کے مطابق، 1967 میں قبضے میں لی گئی ان سرزمینوں کو لوٹا گیا، ان کے وسائل کا استحصال کیا گیا، اور غیر قانونی صیہونی ریاست نے اپنی معیشت کو مضبوط کیا۔
آج بھی فلسطینی ان دنوں کی ہولناک یادوں کو دہراتے ہیں، جب زبردستی گھروں سے نکالا گیا، اور بستیوں کو منظم طریقے سے مسمار کیا گیا۔ فلسطینیوں کا اتفاق ہے کہ موجودہ وقت میں جاری غیر قانونی صیہونی ریاست اسرائیل کی نسل کش جنگ 1967 کے بعد کی سب سے شدید اور تباہ کن ہے۔
اونروا نے اپنے بیان میں واضح کیا کہ شمالی مغربی کنارے میں غیر قانونی صیہونی ریاست اسرائیل کی فوجی کارروائیوں نے "منظم تباہی اور فلسطینیوں کی جبری نقل مکانی” کو جنم دیا ہے، جس میں مکانات کو مسمار کرنے کے احکامات بھی شامل ہیں جن سے پناہ گزین کیمپوں اور فلسطینی خاندانوں پر اثر پڑا ہے۔
اونروا نے یہ بھی کہا کہ وہ اپنے شراکت داروں کے ساتھ مل کر انسانی ہمدردی کی فوری امداد، اور بے گھر خاندانوں کے لیے نفسیاتی و سماجی مدد فراہم کر رہی ہے۔ اس کے علاوہ، ان کے عملے کی جانب سے مغربی کنارے میں بنیادی خدمات کی فراہمی، موبائل کلینکس، اور آن لائن تعلیمی سہولیات جاری ہیں، لیکن مجموعی صورتحال "انتہائی تشویشناک” ہے۔
رفح میں امدادی کارکنوں کا قتل… انسانیت سوز مشن اسرائیلی جرم میں بدل گیا، جب سے غیر قانونی صیہونی ریاست اسرائیل نے غزہ پر نسل کش جنگ کا آغاز کیا ہے، اس نے اپنی جارحیت کو مغربی کنارے بشمول مشرقی بیت المقدس تک بڑھا دیا ہے، جس کے نتیجے میں اب تک 944 سے زائد فلسطینی شہید، تقریباً 7000 زخمی، اور 15,700 سے زائد گرفتار کیے جا چکے ہیں، جیسا کہ فلسطینی سرکاری اعداد و شمار بتاتے ہیں۔
امریکا کی مکمل حمایت کے ساتھ، غیر قانونی صیہونی ریاست اسرائیل نے 7 اکتوبر 2023 سے غزہ میں نسل کشی شروع کر رکھی ہے، جس کے نتیجے میں اب تک 1,65,000 سے زائد فلسطینی شہید و زخمی ہو چکے ہیں، جن میں زیادہ تر خواتین اور بچے ہیں، جب کہ 11 ہزار سے زائد افراد لاپتا ہیں۔