(روز نامہ قدس ۔آنلائن خبر رساں ادارہ) حزب اللہ کے شہید رہنما حسن نصراللہ کو لبنانی دارالحکومت بیروت میں سپرد خاک کر دیا گیا، جبکہ ان کے جانشین نامزد کیے گئے ہاشم صفی الدین کی تدفین کل جنوبی لبنان میں عمل میں لائی جائے گی۔
بیروت اسٹیڈیم میں منعقدہ نماز جنازہ میں ایرانی وزیر خارجہ، ایرانی پارلیمانی اسپیکر سمیت دنیا بھر سے لاکھوں افراد نے شرکت کی۔ لبنانی سکیورٹی ذرائع کے مطابق، تقریباً 10 لاکھ سوگواران جنازے میں شریک ہوئے، جن میں مختلف ممالک سے تعلق رکھنے والے سیاسی و عسکری رہنما بھی شامل تھے۔
حزب اللہ کے سینئر رہنما نعیم قاسم نے اجتماع سے خطاب کرتے ہوئے اعلان کیا کہ حسن نصراللہ کی جدوجہد کو ہر حال میں جاری رکھا جائے گا اور مزاحمت ختم نہیں ہوئی۔ اس موقع پر ایرانی سپریم لیڈر آیت اللہ خامنہ ای نے بھی ایک پیغام کے ذریعے غاصبانہ تسلط اور جبر کے خلاف جدوجہد جاری رکھنے کے عزم کا اعادہ کیا۔
ادھر، جنازے کے دوران اسرائیلی جنگی طیارے نچلی پروازیں کرتے رہے، جسے حزب اللہ کی صفوں میں اشتعال انگیزی کی کوشش قرار دیا جا رہا ہے۔ اسرائیلی وزیر دفاع اسرائیل کاٹز نے اپنے بیان میں کہا کہ حسن نصراللہ کے جنازے پر پرواز کرنے والے اسرائیلی طیارے ایک واضح پیغام دے رہے ہیں کہ اسرائیل پر حملہ کرنے والے انجام کو پہنچیں گے۔
واضح رہے کہ اسرائیلی فوج نے ایک ویڈیو جاری کی ہے جس میں 27 ستمبر 2024 کو بیروت پر کیے گئے بڑے فضائی حملے کی تفصیلات شامل ہیں، جس میں اس وقت کے حزب اللہ کے سربراہ حسن نصراللہ کو نشانہ بنایا گیا تھا۔ اسرائیلی فوج کے مطابق، یہ کارروائی شام 6 بج کر 21 منٹ پر "آپریشن نیو آرڈر” کے تحت انجام دی گئی تھی۔