اسرائیل جنگ بندی جاری رکھنے کا خواہشمند ہے: صیہونی ریاست کا حماس کو پیغام

(روز نامہ قدس ۔آنلائن خبر رساں ادارہ) غیر قانونی صیہونی ریاست اسرائیل کے عبرانی نیوز چینل والاہ نے ایک نامعلوم سینئر اسرائیلی فوجی اہلکار کے حوالے سے بتایا ہے کہ اسرائیل نے بدھ کے روز ثالثوں کے ذریعے حماس کو ایک پیغام بھیجا ہے، جس میں کہا گیا ہے کہ اگر حماس معاہدے کی پابندی کرے اور ہفتے کے روز تین اسرائیلی قیدیوں کو رہا کرے تو وہ اپنی طرف سے معاہدے پر عملدرآمد جاری رکھے گی۔معروف اسرائیلی ہارٹز اخبار نے اسرائیلی اندازوں کے حوالے سے بتایا کہ حماس معاہدے کے پہلے مرحلے کو مکمل کرنے میں دلچسپی رکھتی ہے۔

والاہ نے مزید کہا کہ اسرائیلی ثالثوں کے ساتھ مل کر تین قیدیوں کی رہائی سے متعلق بحران کو حل کرنے کی کوشش کر رہے ہیں، تاکہ معاہدے کے ٹوٹنے سے بچا جا سکے اور معاہدے کے پہلے مرحلے میں باقی17 قیدیوں کی رہائی کو یقینی بنایا جا سکے۔

اسرائیلی اہلکار نے کہا کہ معاہدے کے ٹوٹنے کا خطرہ گزشتہ منگل کے مقابلے میں تھوڑا کم ہو گیا ہے، لیکن صورت حال اب بھی غیر مستحکم ہے۔ انہوں نے کہا، "ہم ثالثوں کے ساتھ مل کر معاہدے کو دوبارہ ٹریک پر لانے کے لیے سخت محنت کر رہے ہیں۔”

ہارٹز اخبار نے بدھ کی شام اسرائیلی سیکیورٹی ادارے کے اہلکاروں کے تخمینوں کا حوالہ دیتے ہوئے کہا کہ حماس معاہدے کے پہلے مرحلے کو جاری رکھنے اور فریقین کے درمیان دوسرے مرحلے کی بات چیت کو آگے بڑھانے میں دلچسپی رکھتی ہے۔

اہلکاروں نے دعویٰ کیا کہ حماس کے فیصلے کے پیچھے اہم وجہ غزہ کے باشندوں کی طرف سے ان پر اندرونی دباؤ ہے، جو شمالی علاقے میں واپس آ رہے ہیں اور غیر قانونی صیہونی ریاست اسرائیل کی فوج کے باعث ہونے والی بڑی تباہی کا مشاہدہ کر رہے ہیں۔

اسرائیلی سیکیورٹی ادارے کے اہلکاروں کے اندازوں  کے مطابق، حماس کو یہ احساس ہے کہ اگر اس کے ارکان ان باشندوں کو کوئی ٹھوس کامیابی نہیں دکھا سکے، جنہوں نے جنگ کے دوران بھاری جانی نقصان اٹھایا ہے، تو غزہ میں ان پر دباؤ بڑھے گا۔

معاہدے کے ٹوٹنے سے نہ صرف قیدیوں کی رہائی رک سکتی ہے، بلکہ شمالی غزہ کی تعمیر نو کے انسانی امداد اور کوششوں کو بھی روکا جا سکتا ہے، جو اسرائیلی اہلکاروں کے خیال میں ناراضی کا باعث بنے گا۔ اس لیے، حماس جنگ ختم ہونے تک بات چیت جاری رکھنے اور معاہدے میں پیشرفت کرنے کی کوشش کر رہی ہے۔

ہارٹز اخبار کے مطابق، دیگر اسرائیلی اندازوں سے پتہ چلتا ہے کہ حماس نہ صرف بات چیت کو ناکام بنانے سے گریز کرے گی، بلکہ معاہدے کے مراحل کو تیز کرنے اور قیدیوں کی منتقلی اور رہائی کے اوقات کو کم کرنے کے لیے دباؤ بھی ڈال سکتی ہے۔ نیز، معاہدے کے تحت غزہ پٹی میں رہا کیے جانے والے کچھ قیدی حماس کے بڑے عہدیدار ہیں یا ان میں تحریک کی تعمیر نو اور غزہ میں حکومت چلانے میں مدد کرنے کی صلاحیت موجود ہے۔