(روز نامہ قدس ۔آنلائن خبر رساں ادارہ)مصر کے صحرائے سینا کے شمالی علاقے کے گورنر خالد مجاور، نے تصدیق کی کہ "رفح بارڈر کراسنگ کو چند دنوں میں کھولا جائے گا تاکہ فلسطینی زخمیوں اور مریضوں کا علاج مصر کے اسپتالوں میں کیا جا سکے۔”
انہوں نے مزید وضاحت دیتے ہوئے کہا کہ "مصر کے حصے میں کراسنگ 1000% تیار ہے، جبکہ غزہ پر غیر قانونی صیہونی ریاست اسرائیل کی وحشیانہ بمباری سے انفراسٹرکچر کو نقصان پہنچا ہے جیسے ہی یہ انفرا اسٹرکچر تیار ہوجائے گا ، فلسطینیوں کی آمدورفت شروع ہوجائے گی۔خالد مجاور نے یہ بھی بتایا کہ "یورپی یونین کا ایک مشن فلسطینی حصے میں کراسنگ کی نگرانی کرے گا، جبکہ مصری حصہ مکمل طور پر مصر کا ہوگا۔”
دوسری طرف، مصر کے وزیر خارجہ، بدر عبد العاطی، نے اعلان کیا کہ "رفح بارڈر کراسنگ جلد ہی کھول دی جائے گی، جب فلسطینی جانب کی تیاری مکمل ہو گی اور یورپی نگران موجود ہوں گے۔”عبد العاطی نے ایک ٹی وی انٹرویو میں کہا کہ "انسانی اور طبی امداد ابھی تک اچھے انداز میں پہنچ رہی ہے اور یہ روزانہ 600 ٹرکوں کی مقدار سے بھی تجاوز کر گئی ہے۔” انہوں نے مزید کہا کہ "مصر تیار ہے، مگر غیر قانونی صیہونی ریاست اسرائیل نے کراسنگ کے فلسطینی حصے کی کئی عمارتوں کو تباہ کر دیا ہے، اور یورپی نگران وہاں موجود ہوں گے۔”