حماس غزہ کی حقیقی حکمران ہے، نیویارک ٹائمز

(روز نامہ قدس ۔آنلائن خبر رساں ادارہ) صیہونی ریاست غزہ پر طاقت کے وحشیانہ استعمال کے باجود اپنی شکست دنیا سے چھپانے میں ناکام ہوگئی ہے۔ہزاروں نہتے شہریوں کی شہادت ، اسلحہ اور سرنگوں سمیت پورے شہر کی تباہی کے باوجود اسرائیل فلسطینی مزاحمتی تحریک حماس کو ختم کرنےمیں ناکام رہا غزہ اب بھی حماس کے زیر کنٹرول ہے۔

امریکی اخبار نیویارک ٹائمز کا کہنا ہے کہ سیز فائر شروع ہوتے ہی حماس کے مسلح جنگجوؤں کا سڑکوں پر آنا یہ پیغام تھا کہ ہزاروں ارکان کی شہادت، اسلحہ اور سرنگوں کی تباہی کے باوجود حماس کو ختم نہ کیا جا سکا اور اب بھی وہ غزہ کی مضبوط ترین جماعت ہے۔

امریکی اخبار کی رپورٹ میں کہا گیا ہے کہ اسرائیلی وزیراعظم بنیامین نیتن یاہو حماس کے خاتمے کے دعوے کرتے رہے لیکن غزہ کے لیے کوئی متبادل نہ پیش کرسکے۔ ۔ دوسری جانب عرب میڈیا رپورٹس میں کہا گیا ہے کہ اسرائیلی فوج غزہ میں جنگ بندی کی مسلسل خلاف ورزیاں کررہی ہے اور گزشتہ روز رفح میں ملبہ صاف کرتے لوگوں پر اسرائیلی کواڈ کاپٹر (ڈرون) نے فائرنگ کی جس کے نتیجے میں ایک فلسطینی شہید اور 4 زخمی ہوگئے۔