حماس 34 یرغمالیوں کی اسرائیلی فہرست سے متفق، نام حوالے کردیئے

اسرائیلی مذاکراتی وفد کے ذرائع نے بتایا کہ غزہ معاہدے کے تمام بقایا نکات پر بات چیت مکمل ہو چکی ہے، اور اب سیاسی سطح پر فیصلے کا انتظار ہے۔ اسرائیلی ذرائع کے مطابق، یہ معاہدہ عبوری نوعیت کا ہو گا اور تقریباً دو سے تین ماہ تک جاری رہنے کی توقع ہے۔ معاہدے میں حماس کے رہنماؤں کو اندرون اور بیرون ملک نشانہ بنانے سے استثنیٰ دینے کی شرط رکھی گئی ہے، جس کے بدلے وہ غزہ کی پٹی چھوڑ دیں گے اور اقتدار ایک آزاد فلسطینی ادارے کے حوالے کر دیا جائے گا۔

اسرائیلی ذرائع نے یہ بھی کہا کہ غزہ میں بین الاقوامی افواج کو تعینات کیا جا سکتا ہے، جیسا کہ جنوبی لبنان میں یونیفِل کی موجودگی ہے، اور امریکہ اس معاہدے کی تمام شقوں کے نفاذ کی سرپرستی کرے گا۔ اس وقت اسرائیل اور حماس کے درمیان جنگ بندی کے قریب پہنچنے کی اطلاعات ہیں، تاہم یہ واضح نہیں ہو سکا کہ دونوں فریق حتمی معاہدہ کے کتنے قریب ہیں۔ اس دوران، اسرائیلی حملوں میں غزہ میں کم از کم 9 فلسطینی ہلاک ہو گئے ہیں اور اس ہفتے کے آخر تک ہلاکتوں کی تعداد 97 تک پہنچ چکی ہے۔