اسرائیل کے بعد صدر محمود عباس نے بھی الجزیرہ پر پابندی لگادی

‘الجزیرہ’ پر فلسطینی اتھارٹی کی اس پابندی کے پیچھے اسرائیل کا بھی دباؤ کارفرما ہے، کیونکہ اسرائیل نے پہلے ہی اس چینل کی نشریات پر مغربی کنارے میں پابندی عائد کر رکھی ہے۔ فلسطینی اتھارٹی کی وزارتی کمیٹی نے واضح کیا ہے کہ نشریات کی معطلی کا مقصد دھوکہ دہی اور لڑائی کے منظرناموں کو مزید ہوا دینے سے بچنا ہے۔ اس کمیٹی میں وزارت ثقافت، وزارت داخلہ اور وزارت مواصلات کے وزراء شامل ہیں، جنہوں نے اس اقدام کی حمایت کی ہے۔

‘الجزیرہ’ کو اسرائیلی فوج کی جانب سے پہلے بھی تنقید کا سامنا رہا ہے، اور اس کی نشریات پر ستمبر 2023 سے ہی اسرائیل نے مغربی کنارے میں پابندیاں عائد کی تھیں۔ اسرائیلی فوج نے رام اللہ میں ‘الجزیرہ’ کے بیورو پر چھاپہ مار کر اس کی سرگرمیاں روکنے کی کوشش کی تھی۔ فلسطینی اتھارٹی کے اس حالیہ فیصلے کے بعد، یہ خدشہ ظاہر کیا جا رہا ہے کہ ‘الجزیرہ’ کی نشریات محصور شہر غزہ میں، جہاں حماس کی حکومت ہے، جاری رہیں گی، جب کہ یہ پابندی صرف مقبوضہ مغربی کنارے تک محدود رہ سکتی ہے۔