(روز نامہ قدس ۔آنلائن خبر رساں ادادہ) غیر قانونی صیہونی ریاست اسرائیل کے میڈیا نے انکشاف کیا ہے کہ 7 اکتوبر 2023 سے اب تک اسرائیلی فوج، سیکیورٹی فورسز اور عام شہریوں میں زخمیوں کی تعداد 25 ہزار تک پہنچ چکی ہے۔ یہ تعداد فلسطینی مزاحمت کاروں کے غزہ میں شدید حملوں کے دوران ریکارڈ کی گئی۔ مزاحمت کاروں کے ساتھ یہ جھڑپیں غاصب صیہونی افواج کی وحشیانہ کارروائیوں کا جواب ہیں جو اسرائیلی جارحیت کا منہ بولتا ثبوت ہیں ۔
اسی عرصے میں حزب اللہ کے ساتھ جنوبی لبنان میں زمینی معرکے بھی جاری رہے، جس نے اسرائیل کو کئی محاذوں پر الجھا دیا۔ اسرائیل کے سیکیورٹی ادارے کے مطابق اس دوران 5087 فوجی زخمی ہوئے ہیں، جو خاص طور پر زمینی جھڑپوں، بم دھماکوں اور دیگر حملوں کا نتیجہ ہیں۔ دیگر حملوں میں فلسطینیوں کی جانب سے کی جانے والی مزاحمتی کارروائیاں شامل ہیں، جنہوں نے متعدد اسرائیلی افواج کو معذور کر دیا۔
ایک رپورٹ کے مطابق زخمی ہونے والوں میں زیادہ تر فوجیوں اور سیکیورٹی اہلکاروں کے زخم گولیاں لگنے کی وجہ سے ہیں، جب کہ کئی افراد دھماکوں کی وجہ سے جلنے اور دیگر جسمانی چوٹوں کا شکار ہوئے ہیں۔ اس کے علاوہ، نفسیاتی مسائل میں مبتلا افراد کی تعداد میں اضافہ ہو رہا ہے، جس سے ان کی روزمرہ کی زندگی اور کام پر اثر پڑ رہا ہے۔ "یدیعوت احرونوت” کے مطابق یہ طبی، جسمانی اور ذہنی نوعیت کی چوٹیں ہیں جو ان کی سماجی زندگیوں پر گہرے اثرات مرتب کررہی ہے۔