عبرانی ذرائع ابلاغ کا کہنا ہے کہ اسرائیل کے لئے برطانیہ کے نئے سفیر اپنی ذمہ داریاں سنبھالنے کے لئے اتوار کے روز تل ابیب پہنچ رہے ہیں۔ اسرائیلی ریڈِیو کے مطابق نئے سفیر میتھیو گولڈ مذہبا یہودی ہیں اور وہ موجودہ سفیر ٹوم فلیپس کی جگہ ذمہ داری سنبھالیں گے۔ مسٹر ٹوم فلیپس نے گذشتہ چار برس تک تل ابیب میں برطانیہ کے سفیر کے طور پر خدمات سرانجام دیں۔ مسٹر میتھِیو گولڈ آئندہ چند ہفتوں میں اسرائیلی صدر شمعون پیریز کو اپنی تقرری کے کاغذات پیش کریں گے۔ یاد رہے کہ وہ اسرائیل میں برطانیہ کے پہلے یہودی سفیر ہوں گے۔ عبرانی ریڈیو نے نئے سفیر میتھیو کے حوالے سے بتایا کہ برطانیہ، اسرائیل کو اپنا اسٹرٹیجیک حلیف سمجھتا ہے۔ دونوں ملکوں کے درمیان سائنس، سیکیورٹی، ٹکنالوجی سمیت مختلف شعبوں میں گہرے تعلقات موجود ہیں۔