(روز نامہ قدس ۔آنلائن خبر رساں ادارہ) سعودی وزیر خاجہ شہزادہ فیصل بن فرحان نے کہا ہے کہ سعودی عرب غزہ میں جنگ بندی کیلئے ہر ممکن اقدام کرنے سے گریز نہیں کرے گا ، خود مختار فلسطینی ریاست کا قیام اسرائیل کے ساتھ تعلقات قائم کرنے کی پہلی شرط ہے۔
سعودی وزیر خارجہ شہزادہ فیصل بن فرحان سے اقوام متحدہ کی ایجنسی برائے بحالی فلسطینی پناہ گزین (انروا )کے کمشنر فلپ لازارینی نے وفد کے ہمراہ ملاقات کی۔سعودی وزیر خارجہ نے کہا کہ مملکت غزہ میں اسرائیلی فورسز کی جاری وحشیانہ نسل کشی کی مذمت کرتی ہے ، مذمتی بیانات فلسطینی علاقوں میں اسرائیلی جارحیت روکنے کیلئے کافی نہیں۔انھوں نے کہا کہ غزہ اور لبنان کی صورتحال پر جلد عرب اسلامی سربراہی اجلاس بلایا جائے گا۔سعودی وزیر خارجہ کے مطابق سعودی عرب فلسطینیوں کیلئے یو این ایجنسی کی مکمل حمایت جاری رکھے گا۔