لبنان کو غزہ جیسی تباہی کا سامنا کرنا پڑسکتا ہے، نیتن یاہو کی دھمکی

(روز نامہ قدس ۔آنلائن خبر رساں ادارہ) نیتن یاہو نے تاریخی ہٹ دھرمی کا مظاہرہ کرتے ہوئے لبنان کے شہریوں کو مخاطب کیا اور کہا کہ اگر آپ نے اپنے ملک کو حزب اللہ سے آزاد نہیں کرایا تو اس کا حال بھی غزہ جیسا ہوسکتا ہے۔

غاصب صیہونی ریاست اسرائیل کے وزیراعظم نیتن یاہو نے گذشتہ روز اپنے ویڈیو بیان میں لبنان کے عوام کو مخاطب کرتے ہوئے اپنے سنگین جنگی جرائم اور عالمی قوانین کی خلاف ورزیوں پر تاریخی ڈھٹائی کا مظاہرہ کرتے ہوئے کہا ہے کہ اگر انہوں نے اپنے ملک کو حزب اللہ سے آزاد نہیں کیا تو انہیں تباہی اور مصائب کا سامنا کرنا پڑے گا جیسا کہ غزہ کی پٹی میں فلسطینیوں کو سامنا کرنا پڑا ہے۔

انھوں نے کہا کہ آپ کے پاس لبنان کو بچانے کا موقع ہے اس سے پہلے کہ یہ ایک طویل مدتی جنگ کی کھائی میں گر جائے اور ایسی تباہی اور مصائب کا باعث بنے جیسی تباہی ہم غزہ میں دیکھ رہے ہیں۔ انہوں نے مزید کہا کہ میں تم سے کہتا ہوں کہ لبنان کے لوگو، اپنے ملک کو حزب اللہ سے آزاد کرو تاکہ یہ جنگ رک جائے۔

فرانس کے وزیر خارجہ جین نول باروٹ نے لبنان کی تباہی کے حوالے سے نیتن یاہو کی اشتعال انگیزی کی مذمت کی۔ چینل ’’فرانس 2‘‘ کے ساتھ ایک انٹرویو میں جان نویل بیرو نے تصدیق کی ہے کہ لبنان کی صورت حال تباہ کن ہے۔ انہوں نے مزید کہا کہ اگر یہ اشتعال انگیزی آگے بڑھی تو یہ فرانس کے دوست ملک لبنان کو افراتفری کی طرف گھسیٹ لے گا جب کہ وہ انتہائی کمزوری کی حالت سے دوچار ہے، اس سے اسرائیل کو ان سے زیادہ سکیورٹی مسائل کا سامنا کرنا پڑے گا۔