(روز نامہ قدس ۔آنلائن خبر رساں ادارہ) فلسطین فاؤنڈیشن پاکستان کے زیراہتما م کراچی میں نمائش چورنگی پر شہدائے حماس و حزب اللہ بالخصوص سید حسن نصر اللہ اور اسماعیل ھانیہ سے تجدید عہد کرنے کےلئے شمع روشن کرنے کا پروگرام منعقد کیا۔
چراغاں کے پروگرام میں حزب اللہ کے سربراہ سید حسن نصر اللہ اور حماس کے سربراہ اسماعیل ھانیہ کی بڑی بڑی تصاویرآویزاں کی گئی تھیں۔
چراغاں کی تقریب میں جماعت اسلامی سندھ کے امیر محمد حسین محنتی، مجلس وحدت مسلمین سندھ کے صدر علامہ باقر عباس زیدی، علامہ مختار امامی،سابق رکن سندھ اسمبلی میجر (ر) قمر عباس، پاکستان مسلم لیگ نواز کے رہنما پیر ازہر علی ہمدانی، جمعیت علمائے پاکستان کے رہنما علامہ عقیل انجم قادری، پاکستان تحریک انصاف کے رہنما اسرار عباسی، جمعیت اہلحدیث کے رہنما مفتی مرتضی رحمانی، تحریک ہزارہ کے محمد ارشد سمیت علامہ صادق جعفری، علامہ مبشر حسن، رضی حیدر، علامہ نہال بنگش ، علامہ حمید کاظمی،مولانا حسین مسعودی، زیب فاطمہ، صدف علی، سارہ نوازش سمیت خواتین اور بچوں کی بڑی تعداد نے شرکت کی اور شہید حسن نصر اللہ اور شہید اسماعیل ھانیہ کو خراج عقیدت پیش کیا۔
چراغاں کی تقریب سے خطاب کرتے ہوئے مقررین نے کہاکہ حماس اور حزب اللہ پوری مسلم امہ کے لئے افتخار کا باعث ہیں۔ حزب اللہ کے سربراہ سید حسن نصر اللہ اور حماس رہنما اسماعیل ھانیہ کی شہادت سے حماس اور حزب اللہ کو ختم نہیں کیا جاسکتا، فتح مزاحمت ہی کی ہو گی۔
مقررین کاکہنا تھا کہ آزادی بیت المقدس کی راہ میں اپنی جانیں قربان کردیں گے۔ شہید حسن نصر اللہ کی تمام زندگی خطہ میں نا جائز ریاست اسرائیل کے خلاف مقاومت میں گزری۔
پوری پاکستانی قوم شہید حسن نصر اللہ کو خراج عقیدت پیش کرتی ہے۔اس موقع پر شہریوںنے حسن نصر اللہ اور اسماعیل ھانیہ کی تصاویر پر گلدستے رکھے اور شمعیں بھی روشن کیں۔