القسام بریگیڈ کا لبنان سے صیہونی ریاست پر 40 میزائلوں سے حملہ

(روز نامہ قدس ۔آنلائن خبر رساں ادارہ ) القسام بریگیڈ نے لبنانی سرزمین سے کارمل، دیمون جیل اور نیشر پر 40 میزائلوں سے بمباری کی”۔

فلسطین پر قابض غیر قانونی صیہونی ریاست اسرائیل کی دہشتگردی کے خلاف برسرپیکار فلسطینی اسلامی مزاحمتی تحریک حماس کے عسکری ونگ القسام بریگیڈ نے لبنان پر صیہونی ریاست کی وحشیانہ جارحیت اور اس کے نیتجےمیں پانچ سو سے زاید شہریوں کی شہادت اور دو ہزار کے قریب زخمی ہونے کے بعد لبنانی سرزمین سے اپنے ردعمل کے حوالے سے ایک مختصر بیان جاری کیا ہے جس میں بتایاگیا ہے کہ القسام بریگیڈ نے لبنانی سرزمین سے صیہونی ریاست کے شمالی علاقوں میں متعدد فوجی کیمپوں پر 40 میزائل داغے ہیں۔

القسام نے ایک مختصر بیان میں کہا کہ "ہم نے لبنانی سرزمین سے کارمل، دیمون جیل اور نیشر پر 40 میزائلوں سے بمباری کی”۔القسام نے اس سے قبل جنوبی لبنان سے اسرائیلی بستیوں پر میزائل داغے تھے۔

حماس نے ایک بیان میں کہا ہے کہ لبنان میں امریکی اور مغربی حمایت سے شروع کی گئی اسرائیلی جارحیت صہیونی فاشسٹ ریاست کا ایک نیا جنگی جرم ہے۔حماس نے فلسطینی اور لبنانی عوام کے درمیان یکجہتی کی ضرورت پر زور دیتے ہوئے کہا کہ بزدل دشمن کی اس وحشیانہ جارحیت کے مقابلے میں حماس حزب اللہ اور برادر لبنانی عوام کے ساتھ کھڑی ہے۔