(روز نامہ قدس ۔آنلائن خبر رساں ادارہ )حزب اللہ کا کہنا ہے کہ یہ ہمارے کمانڈر فواد شکر کی شہادت کے بدلے کا پہلا مرحلہ ہے جو مکمل ہوگیا ہے۔
قطر کے نشریاتی ادارے الجزیرہ کی رپورٹ کےمطابق لبنان کی مزاحمتی تحریک حزب اللہ کی جانب سے جاری کردہ بیان میں بتایا گیا ہے کہ حزب اللہ نے اپنے کمانڈر فواد شکر کے قتل کا بدلہ لینے کے لیے غیر قانونی صیہونی ریاست اسرائیل کے شمالی علاقوں پر رات گئے 320 راکٹ اور 100سےزائد دھماکا خیز ڈرون فائر کیے۔ حزب اللہ نے اپنے حملوں میں صیہونی ریاست کی فوجی تنصیبات اور دفاعی نظام آئرن ڈوم کو نشانہ بنایا اور یہ ہمارے کمانڈر فواد شکر کے قتل کے انتقام کا صرف پہلا مرحلہ ہے جو اب مکمل ہوا ہے۔
صیہونی ریاست کے میڈیا کی رپورٹ کے مطابق حزب اللہ کے حملوں کے بعد فلسطین پر قابض غیر قانونی صیہونی ریاست میں آئندہ 48گھنٹوں کےلیے ایمرجنسی صورتحال کا اعلان کیا گیا ہے اور لوگوں کو گھروں میں رہنے کی ہدایت کی گئی ہے۔
حزب اللہ کے حملوں کے جواب میں اسرائیلی جنگی طیاروں نے بھی لبنان پر حملے شروع کر دیے ہیں جب کہ اسرائیلی فوج نے یہ دعویٰ بھی کیا کہ ہماری ائیر فورس کے 100 جنگی طیاروں نے حزب اللہ کے راکٹ لانچر سائٹس پر پیشگی حملے کرکے ہزاروں راکٹس کو حزب اللہ کے حملے سے قبل ہی تباہ کردیا تھا۔