(روز نامہ قدس ۔آنلائن خبر رساں ادارہ ) ترک صدر طیب ایردوآن نے حماس کے سیاسی بیورو کے سربراہ اسماعیل ھنیہ کی اہلیہ اور بچوں کے ساتھ فون کال پر گفتگو کی اور اس واقعے پر گہرے رنج وغم کا اظہار کیا۔
تُرک ایوان صدرکے شعبہ اطلاعات کی طرف سے جاری کردہ ایک بیان کے مطابق بدھ کو صدر ایردوآن نے شہید رہ نما ہنیہ کی اہلیہ اور بچوں کے ساتھ فون پر بات کی۔ٹیلی فون کال پر طیب اردوان نے کہا کہ اسماعیل ہنیہ کا بہیمانہ اوربزدلانہ قتل مزاحمت کو ختم نہیں کرسکتا ہے انھوں نے لواحقین سے ہنیہ کی شہادت پر اپنے گہرے دکھ کا اظہار کیا۔
انہوں نے کہا کہ میں تہران میں حماس کے سیاسی بیورو کے سربراہ اسماعیل ھنیہ کے قابل نفرت قتل کی شدید مذمت کرتا ہوں۔ اس گھناؤنے قتل کا مقصد فلسطینی کاز، غزہ کی شاندار جدوجہد اور ہمارے فلسطینی بھائیوں کی جائز مزاحمت کو کمزور کرنا اور ان کے حوصلے پست کرنا اور انہیں خوفزدہ کرنا ہے۔
انہوں نے اپنی بات جاری رکھتے ہوئے کہا کہ میرے بھائی ھنیہ کو شہید کرنے کا ہدف وہی ہے جو غزہ میں شیخ احمد یاسین، عبدالعزیز الرنتیسی اور بہت سی سیاسی شخصیات کو نشانہ بنایا گیا، لیکن جیسا کہ آج تک ہوا ہے، صیہونی بربریت کے باوجود وہ اپنے مذموم عزائم میں کامیاب نہیں ہوسکا۔