(روز نامہ قدس ۔آنلائن خبر رساں ادارہ ) میں تحقیقات میں حصہ لینا جاری رکھوں گا تاکہ جو کچھ سات اکتوبر کو ہوا وہ دوبارہ نہ دہرایا جا سکے۔
غزہ ڈویژن کے کمانڈر بریگیڈیئر جنرل ایوی روزن فیلڈ نے غزہ کے اطراف میں غیر قانونی صیہونی بستیوں کے تحفظ کے اپنی زندگی کے مشن میں ناکام ہونے کی بنا پر اپنے فوج سے سبکدوش ہونے کا اعلان کردیا کرتےہوئے نام نہاد صیہونی فوج کے چیف آف سٹاف ہرزی ہیلیوی اور جنوبی ڈویژنل کمانڈر اوری گورڈین کو باضابطہ طور پر ایک خط بھیجاہے جس میں انھوں نے کہا ہے کہ وہ اپنے عہدے پر بدترین ناکامی کی ذمہ داری اٹھاتے ہوئے مستعفی ہورہے ہیں۔
جنرل ایوی روزن نے خط میں کہا کہ انہوں نے 143ویں ڈویژن (غزہ ڈویژن) کے کمانڈر کا عہدہ ختم کرنے اور فوج سے سبکدوش ہونے کا فیصلہ کیا ہے۔ انہوں نے کہا ہر ایک کو اپنی ذمہ داری اٹھانا ہوگی اور میں 143 ویں ڈویژن کا ذمہ دار ہوں۔ انہوں نے زور دے کر کہا کہ وہ اس وقت تک اسرائیلی غزہ ڈویژن کے سربراہ رہنے کا ارادہ رکھتے ہیں جب تک کہ کسی متبادل کی تقرری نہیں کی جاتی اور قیادت کو منظم اور ذمہ دارانہ انداز میں منتقل نہیں کردیا جاتا، انھوں نے کہا کہ وہ تحقیقات میں حصہ لینا جاری رکھیں گے تاکہ جو کچھ سات اکتوبر کو ہوا وہ دوبارہ نہ دہرایا جا سکے۔
صیہونی فوج کے اعلیٰ عہدیدار کا استعفی اس وقت سامنے آیا ہے جب غاصب ریاست کی جنگی کمان کونسل کے رکن بینی گانٹز اور آئزن کوٹ نے نیتن یاہو کی جنگی پالیسیوں کو اسرائیل کی سلامتی کیلئے خطرہ قرار دیتے ہوئے مستعفی ہوگئے ہیں ۔