(روز نامہ قدس ۔آنلائن خبر رساں ادارہ ) غزہ میں مزاحمت کاروں اور شمال میں حزب اللہ کے ساتھ جھڑپوں کے دوران صیہونی فوج کے 12 فوجی ہلاک اور 46 زخمی ہوگئے ہیں جن میں سے 16 کی حالت تشویشناک ہے۔
غیر قانونی صیہونی ریاست اسرائیل کے معروف اخبار ہاریٹز کی رپورٹ کے مطابق غاصب صیہونی فوج نے گذشتہ روز تسلیم کیا کہ غزہ اورلبنان کے ساتھ شمالی سرحد پر گذشتہ 24 گھنٹوں کے دوران ہونے والی جھڑپوں میں اب تک افسران سمیت 12 فوجی اہلکار ہلاک جبکہ 46 فوجی زخمی ہوئے ہیں جن میں سے 16 کی حالت تشویشناک ہے۔
اسرائیلی میڈیا نے اطلاع دی کہ 7 اکتوبر 2023 کو غزہ میں فلسطینی مزاحمت کاروں کے ساتھ جنگ کے آغاز سے لے کر اب تک صیہونی "فوج” میں 20,000 فوجی اہکار زخمی ہو چکے ہیں، زخمیوں میں سے 8,298 کو معذور قرار دیا گیا ہے جبکہ بڑی تعداد ابھی تک اسپتالوں میں زیر علاج ہے۔ اسرائیلی میڈیا نے غزہ میں آٹھ ماہ سے جاری جنگ میں زخمی ہونے والے افراد کی بڑی تعداد کو "چوٹی کی تعداد” قرار دیا۔جبکہ اسرائیلی میڈیا اور اسرائیلی اسپتال کی رپورٹیں بڑی تعداد میں انفیکشن کی تصدیق کرتی ہیں۔
واضح رہے کہ اسرائیلی حکومت کی جانب سے اسرائیلی فوج کو پہنچنے والے نقصان کے حوالے سے سخت سنسر شپ نافذ ہے جس کے باعث اسرائیلی فوج کو ہونے والے نقصان کے درست اعدادو شمار ظاہر نہیں کئے جاتے تاہم آزاد ذرائع کا کہنا ہے کہ اسرائیلی فوج کو ہونے والا نقصان اعلان کردہ نقصان سے کہیں زیادہ ہے ۔