(روز نامہ قدس ۔آنلائن خبر رساں ادارہ ) چا ر ماہ سے زائد عرصے سے جاری نسل کشی میں 20 لاکھ سے زائد فلسطینی بے گھر اور 69,028 زخمی ہوئے ہیں ، 20 ہزار سے زائد لاپتہ ہیں جن کے بارے میں خدشہ ہے کہ وہ اب تک ملبے تلے دبے ہوئے ہیں۔
فلسطینی وزارت صحت کی رپورٹ کے مطابق غیر قانونی صیہونی ریاست اسرائیل کی نام نہاد فوج کی جانب سے سات اکتوبر غزہ پر جاری جارحیت کو آج 135 دن مکمل ہوگئے ہیں اس دوران غاصب فوج نے غزہ میں اسکول ، کالج ،اسپتالوں ، مساجد ، گرجا گھروں سمیت اقوام متحدہ کی پناہ گاہوں کو بھی بدترین بمباری کا نشانہ بنایا ہے جس کے نتیجے میں 15 ہزار سے زائد بچوں اور 11 ہزار سے زائد خواتین سمیت اب تک 29,092 شہید اور 69,028 زخمی ہوئے ہیں۔
رپورٹ کےمطابق وحشیانہ بمباری سے غزہ کی 90 فیصد سے زائد عمارات تباہ ہوچکی ہیں ، جبکہ غاصب فورسز کی جانب سے اسپتالوں کو دانستہ نشانہ بنانے کے باعث شہر میں صرف 3 اسپتال جزوی طورپر کام کررہےہیں جہاں مریضوں اور زخمیوں کی تعداد اسپتال کی استطاعت سے باہر ہے، اسپتال میں بجلی ، آکسیجن اور ادویات نہ ہونے کے باعث روزانہ شہید ہونے والوں کی تعداد میں اضافہ ہورہا ہے۔