غزہ: صیہونی وحشیانہ بمباری روکنے میں معذوری: اقوام متحدہ کا عہدیدار مستعفی

(روز نامہ قدس ۔آنلائن خبر رساں ادارہ ) اقوام متحدہ کے عہدیدار نے خط میں لکھا کہ غزہ میں جو ہو رہا ہے وہ ہر لحاظ سے نسل کشی ہے ،فلسطین میں یورپی نسل پرستانہ آبادکاری منصوبہ اپنے آخری مرحلے میں داخل ہو گیا ہے۔

 فلسطین میں انسانی حقوق کی پامالیاں روکنے میں اقوام متحدہ کی ناکامی پر، انسانی حقوق کمیشن (UNHRC) کے نیویارک آفس کے سربراہ کریگ موخیبر بطور احتجاج اپنے عہدے سے مستعفی ہو گئے۔ جنیوا میں اقوام متحدہ کے ہائی کمشنر برائے انسانی حقوق فولکر ٹُرک کے نام خط میں اُنہوں نے لکھا کہ غزہ میں جو ہو رہا ہے وہ ہر لحاظ سے نسل کشی ہے،  فلسطین میں یورپی نسل پرستانہ آبادکاری منصوبہ اپنے آخری مرحلے میں داخل ہو گیا ہے اور وہ مرحلہ ہے فلسطینی علاقوں سے آبائی فلسطینیوں کی باقیات کو جلد از جلد ختم کرنا۔

انہوں نے مزید لکھا کہ حد یہ ہے کہ امریکا، برطانیہ اور بیشتر یورپی ممالک اس خوفناک حملے میں برابر کے شریک ہیں۔ کریگ نے اپنے خط میں لکھا کہ یہ حکومتیں جنیوا کنونشن کا احترام کرنے کی اپنی ذمہ داریاں اُٹھانے سے انکار کر رہی ہیں۔