(روز نامہ قدس ۔آنلائن خبر رساں ادارہ ) صیہونی پولیس نےفلسطینی نصاب کے تحت شائع کتب اور اس میں موجود فلسطینی جھنڈے کی وجہ سے فلسطینی بچوں کے اسکول کے بستوں کو ضبط کیا۔
فلسطینی ذرائع کےمطابق غیر قانونی نسل پرست صیہونی ریاست اسرائیل کی نام نہاد سیکیورٹی فورسز نے گذشتہ روز مسجد الاقصیٰ کے احاطےمیں فلسطینی بچوں کے اسکول بیگ کی تلاشی لی اور ان بستوں میں فلسطینی نصاب کے تحت شائع کتابوں اور ان میں موجود فلسطینی جھنڈوں کی وجہ سے فلسطینی طالبعلموں سے ان کے اسکول بیگ چھین لیے۔
القدس اسلامی وقوف کے جاری کردہ تحریری بیان کے مطابق کتابوں کو تحویل میں لینے کے بعد پولیس نے فلسطینی بچوں کومسجد اقصیٰ میں داخل ہونے کی اجازت دے دی۔ تاہم اسرائیلی پولیس کی طرف سے موضوع سے متعلق تاحال کوئی بیان جاری نہیں کیا گیا۔
واضح رہے کہ غیر قانونی نسل پرست صیہونی ریاست اسرائیل نے 1967 میں مشرقی القدس پر قبضہ کیا اور اس وقت سے فلسطینیوں کو بے دخل کرنے کے ہر طریقہ کار پر عمل کیا جارہا ہے۔ تل ابیب انتظامیہ مقبوضہ مشرقی القدس کے فلسطینی اسکولوں کا تعلیمی پروگرام ہٹا کر اس کی جگہ اسرائیلی نصاب شروع کروانے کی کوششوں میں ہے۔ فلسطینیوں کی مصّمم مزاحمت کی وجہ سے اگرچہ اسرائیل اپنے مذموم ارادوں میں کامیاب نہیں ہو سکا لیکن اس سے پیچھے بھی نہیں ہٹا۔