(روز نامہ قدس ۔آنلائن خبر رساں ادارہ ) ہم مقبوضہ مغربی کنارے کے فلسطینی باشندوں کی نقل و حرکت کی آزادی پر صیہونی وزیر کے اشتعال انگیز تبصروں کی شدید مذمت کرتے ہیں۔
امریکی محکمہ خارجہ اور یورپی یونین نے فلسطین پر قابض غیر قانونی صیہونی ریاست کے شدت پسند صیہونی وزیربرائے قومی سلامتی اتیماربن گویر کے اس بیان کی مذمت کی ہے جس میں انھوں نے اپنے خاندان کی نقل و حرکت کی آزادی اور سلامتی فلسطینیوں کی نقل و حرکت کی آزادی سے زیادہ اہم قرار دیا تھا۔
امریکی محکمہ خارجہ کے ترجمان نے کہا کہ ہم مغربی کنارے کے فلسطینی باشندوں کی نقل و حرکت کی آزادی پر اسرائیلی وزیر بن گویر کے اشتعال انگیز تبصروں کی شدید مذمت کرتے ہیں۔
بیان میں مزید کہا گیا کہ "ہم تمام نسل پرستانہ بیان بازی کی مذمت کرتے ہیں، خاص طورپر ایسے بیانات اور تبصرے زیادہ تباہ کن ہوتے ہیں جو اعلیٰ حکومتی عہدوں پر فائز لوگوں کی طرف سے جاری کئے جائیں یہ تمام اقدامات اشتعال انگیز اور انسانی حقوق کی کھلی خلاف ورزیوں میں شامل ہیں۔
یوروپی یونین نے بھی انتہائی دائیں بازو کے وزیر کے ریمارکس پر تنقید کرتے ہوئے اس بات پر زور دیا کہ صیہونی ریاست کے ساتھ ان کے تعلقات کو "انسانی حقوق اور جمہوری اصولوں کے احترام پر مبنی ہونا چاہئے۔”
انہوں نے مزید کہا کہ اسرائیل کو فلسطینیوں کو نقل و حرکت کی آزادی اور مغربی کنارے کے علاقے C کی ترقی کی اجازت دینی چاہیے۔