(روز نامہ قدس ۔آنلائن خبر رساں ادارہ ) صیہونی صدر نے عالمی دباؤ کے باعث اپنے بیان میں کہا کہ معصوم فلسطینی شہریوں کے خلاف فسادات اور پرتشدد کارروائیوں کی سخت مذمت کرتا ہوں۔
مقبوضہ مغربی کنارے میں غیر قانونی صیہونی ریاست اسرائیل کی نام نہاد سیکیورٹی فورسز کی سرپرستی میں فلسیطنیوں کے خلاف غیر قانونی صیہونی آبادکاروں کے منظم حملوں کی ،چین ،جاپان ، فرانس اردن ، مصرپاکستان، سعودی عرب اور دیگر ممالک کی جانب سے سخت تنقید کے باعث صیہونی صدر آئیزیک ہرزوگ کو آبادکاروں کےحملوں کی مذمت کرنا پڑگئی ہے۔
صیہونی ریاست میں ادرونی سیکیورٹی کی خفیہ ایجنسی ’شاباک‘ کی ایک تقریب میں خطاب کرتے ہوئے غیر قانونی صیہونی ریاست کے صدر نے کہا کہ معصوم فلسطینی شہریوں کے خلاف فسادات اور پرتشدد کارروائیاں غیر قانونی اور غیر اخلاقی ہیں، ان اقدامات کے ذریعے ہم اپنی بنیادوں سے دور ہو رہے ہیں اس نازک موڑ پر سب کو ذمہ دارانہ رویہ اختیار کرنا چاہیے۔
ان کا کہنا تھا کہ ہماری سیکیورٹی ایجنسیز کو بہت سے چیلنجز کا سامنا ہے جس میں سول دہشتگردی سب سے اولین ہے۔ انہوں نے تسلیم کیا کہ اسرائیل میں جرائم پیشہ تنظیمیں دہشتگرد تنظیموں کے طور پر فعال ہیں، ان کیلئے ریاستِ اسرائیل کوئی وجود نہیں رکھتی۔