چین کی ثالثی سے ایران اور سعودی عرب کے درمیان مفاہمت ایک معجزہ ہے، محمود عباس

(روز نامہ قدس ۔آنلائن خبر رساں ادارہ ) پوری عرب دنیا اس کا خیر مقدم کرتی ہے اور ہم اس عمل میں چین کے کردار سے بھی خوش ہیں۔

مقبوضہ فلسطین کے صدر محمود عباس نے اپنے چار روزہ دورہ چین کے اختتام پر چین کے معروف ٹی وی چینل کو انٹر ویو دیتے ہوئے ایران اور سعودی عرب کے درمیان طویل اور سنگین اختلافات  کو ختم کرکے  بینظیر اتحاد پر شکریہ اداکرتے ہوئے کہا ہے کہ  ایران اور سعودی عرب کے تعلقات سے پوری عرب دنیا خوش ہے۔

فلسطینی اتھارٹی کے سربراہ کا کہنا تھا کہ ریاض اور تہران کے درمیان اختلافات طویل اور سنگین تھے اور کوئی بھی ملک اسے حل کرنے میں کامیاب نہیں ہوا لیکن ان دونوں ممالک کے ساتھ بات چیت میں چین کی خیر سگالی کی بدولت ایک معجزہ پیداہوا۔ میں ایران اور سعودی عرب کے درمیان مفاہمت کو ایک معجزہ سمجھتا ہوں اور پوری عرب دنیا اس کا خیر مقدم کرتی ہے اور ہم اس عمل میں چین کے کردار سے بھی خوش ہیں۔

واضح رہے کہ ایران اور سعودی عرب نے اپنے سفارتی تعلقات بحال کرنے کے لیے 10 مارچ کو چینی ثالثی میں ایک معاہدے پر دستخط کیے تھے۔ دونوں ممالک کے وزرائے خارجہ نے اس معاہدے کی مناسبت سے بیجنگ، کیپ ٹاؤن اور حال ہی میں تہران میں ملاقات کی۔