کشمیر عالمی سطح پر تسلیم شدہ متنازع علاقہ ہے، بھارت کو من مانی نہیں کرنے دیں گے،بلاول

(روز نامہ قدس ۔آنلائن خبر رساں ادارہ ) پاکستان 5 اگست کے بھارت کے اقدامات کو مسترد کرتا ہے، مسئلہ کشمیر تقسیم ہند کا نامکمل ایجنڈا ہے۔

وزیر خارجہ  پاکستان بلاول بھٹو زرداری نے  بھارت کے زیر تسلط کشمیر میں جی20 اجلاس پراپنے سخت ردعمل میں آزاد کشمیر اسمبلی میں خصوصی خطاب کرتے ہوئے کہا ہے کہ بھارت جی 20 کی صدارت کا غیرقانونی استعمال کرکے دنیا کو باور کرانے کی کوشش کررہا ہے کہ کشمیر غیرمتنازع علاقہ ہےدرحقیقت کشمیر عالمی سطح پر تسلیم شدہ متنازع علاقہ ہے۔

انہوں نے کہا کہ پاکستان بھارت کی جانب سے 5 اگست کے اقدامات کو یکسر مسترد کرتا ہے، آزاد کشمیر سے متعلق بھارت کے جارحانہ بیانات دنیا کے سامنے ہیں، 75 سال سے کشمیری اپنے حق سے محروم ہیں،کشمیریوں کی جدوجہد میں ان کیساتھ ہیں، پاکستان کا لفظ کشمیر کے بغیر نامکمل ہے۔

بلاول بھٹو نے کہا کہ مقبوضہ کشمیر جیل بن چکا، کشمیریوں کی زمینوں پر قبضے کیے جارہے ہیں، بھارتی اقدامات عالمی قانون کی خلاف ورزی ہیں، بھارتی ریاستی دہشت گردی کشمیر کی حقیقت کو نہیں بدل سکتی، بھارت سلامتی کونسل کی قراردادوں پر عمل کرے، وہ جتنی چائے پینا چاہتے ہیں ہم پلائیں گے مگر ملک کے دفاع پر سمجھوتہ نہیں کرینگے۔

 وزیر خارجہ نے کہا کہ ہم بھارت سمیت ہمسایہ ممالک کیساتھ اچھے تعلقات چاہتے ہیں، پاکستان کشمیر سمیت تمام حل طلب مسائل کا مذاکرات کے ذریعے حل چاہتا ہے، مسئلہ کشمیر پر بامعنی مذاکرات کےلیے سازگار حالات پیدا کرنا بھارت کی ذمہ داری ہے۔