(روز نامہ قدس ۔آنلائن خبر رساں ادارہ ) غزہ شہر پر صیہونی ریاست کی غیر قانونی ناکہ بندی کے تحت، فلسطینی ماہی گیروں کو غزہ کے سمندر میں تعینات اسرائیلی جنگی جہازوں کے ذریعے روزانہ حملوں کا نشانہ بنایا جاتا ہے۔
فلسطینی ذرائع ابلاغ کے مطابق، غیر قانونی صیہونی ریاست اسرائیل کی نام نہاد سیکیورٹی فورسز نے آج صبح مقبوضہ فلسطین کے محصور شہر غزہ کے شمال میں واقع بیت لاہیہ کے ساحل پر فلسطینی ماہی گیروں پر حملہ کیا ، فائرنگ اور زہریلی آنسو گیس کے شیل برسائے جس کے باعث وہ اپنی کشتیوں اور دیگر سامان کو چھوڑ کر محفوظ مقام کی جانب چلے گئے ۔غاصب فورسز نے بغیر کسی وجہ کے فلسطینیوں کی کشتیاں ضبط کرلیں ۔
المیزان سینٹر فار ہیومن رائٹس کی رپورٹ کے مطابق، 2022 میں، اسرائیلی قابض بحریہ نے فلسطینی ماہی گیروں کے خلاف 291 حملے کیے، جن میں 3 بچوں سمیت 16 فلسطینی زخمی ہوئے، 7 بچوں سمیت 45 دیگر کو اغوا کیا، اور ماہی گیری کی 14 کشتیوں کو قبضے میں لے لیا۔
یہ بات قابل ذکر ہے کہ اسرائیلی قبضے نے 2007 سے محصور غزہ میں ماہی گیری کے ضروری سامان اور سپلائی کے داخلے پر پابندی عائد کر رکھی ہے ۔